ЦХИНВАЛ, 4 май — Sputnik, Босыкты Наталья. ХИПУ-йы университетон комплексы арæзтады бындур фыццаг дур бавæрыны цытджын церемони уагъд æрцыд æртыццæджы Цхинвалы.
Тæрккъæвдамæ æнæкæсгæйæ, церемонийы хайад райстой сæдæ адæймагмæ æввахс.
Мадзалы цытджын хай байгом кодта ХИПУ-йы ректор Тедеты Вадим, кæцы загъта бузныджы ныхæстæ республикæйы къухдариуæгадæн, университеты историкон бынат кæй бахъахъхъæдта, уый тыххӕй.
"Университеты нырыккон историйы абон у стыр бон. Бузныг мæ фæнды зæгъын республикæйы къухдариуæгадæн, кæцы архайдта, цæмæй университетон комплекс арæзт æрцæуа йæ историкон бынаты. Уый алкæмæн дæр нысаниуæгджын уыд", — загъта Тедеты Вадим.
Президент Тыбылты Леонид раарфæ кодта æрæмбырдуæвджытæн æмæ ныфс бавæрдта, ахуырадон уагдоны ног бæстыхай кæй уыдзæн рæсугъд æмæ нырыккон.
"Ацы хъуыддаг у нысаниуæгджын æппæт нæ адæмæн. Нæ студенттæ сты республикæйы фидæн æмæ уыдон ахуыр кæндзысты ног, нырыккон домæнтæн дзуапдæттæг комплексы", — загъта Тыбылты Леонид.
Церемонийы рæстæджы президент, хицауад æмæ парламенты сæргълæуджытæ, министрæдтæ æмæ ведомствӕты разамонджытæ, университеты ректор æмæ ахуыргæнджытæ, УФ-йы минæвар РХИ-йы, афтæ ма æхсæнадон æмæ фæсивæдон организациты уæнгтæ бавæрдтой капсулæ студенттæм ныстуанимæ, афтæ ма фыццаг дур ног университетон корпусы фундаменты. Уымæй дарддæр ма хайадисджытæ сарæзтой къухфысттæ арæзтадон каскæтыл, кæцытæ ацы нысаниуæгджын цауы цытæн æрвыст æрцæудзысты музеймæ.
Университеты зæронд бæстыхæйтты демонтажон куыстытæ райдыдтой 2016 азы марты. Объекты генералон нардуатисæг Sputnik куыд загъта, афтæмæй абоны бон объекты арæзтады кусынц 75 адæймаджы.
"Уыдон ацы мæйы кæронмæ сæххæст кæндзысты фундаментон куыстытæ æмæ æрæвналдзысты ног комплексы систæ амайынмæ. Фæлындæн куыстыты рæстæджы ма куыстæй сифтонг кæндзыстæм ноджы 50 адæймаджы", — загъта Джуссойты Константин.
Уый радзырдта, университетон комплексы сконды кæй уыдзæн æртæ корпусы — ахуырадон, культурон-фæлладуадзæн æмæ спортивон.
Арæзтадон фирмæ "Мегаполис-Т" объект эксплуатацимæ раттын фæнд кæны 2017 азы кæрон.
2008 азы августы гуырдзиаг-ирон хæсты рæстæджы басыгъд ХИПУ-ы сæйраг бæстыхай. Университеты ног корпусы арæзтад хаст æрцыд 2015-2017 æзты Инвестицион программæмæ. Университеты хатæнтæ фæуæрæхдæр уыдзысты, фæлæ баззайдзысты сæ раздæры бынаты.
