ЦХИНВАЛ, 5 май — Sputnik. Хуссар Ирыстоны Стыр Фыдыбӕстӕйон хӕсты ветерантӕн Уӕлахизы боны цытӕн фӕсивӕдон политикӕ, спорт ӕмӕ туризмы комитет сараздзӕн бӕрӕгбонон мадзӕлттӕ, фехъусын кодта Sputnik уагдоны пресс-секретарь Софа Исаакян.
Бӕрӕгбонон концерт ацӕудзӕн 8 майы Ӕнусон цырты раз.
"Концерты Ирыстоны дыууӕ хайы зарӕггӕнджытӕ — Хаситы Сослан, Саппиаты Залина, Руслан Кабалоти ӕмӕ ӕндӕртӕ сӕххӕст кӕндзысты хӕстон зарджытӕ, уый фӕстӕ бӕрӕгбонон мадзал адарддӕр уыдзӕн Плиты Грисы "Авд цухъхъа"-мӕ гӕсгӕ ист кинонывӕй ", — радзырдта Софа Исаакян.
Уый ма банысан кодта, киноныв "Авд цухъхъа"-йӕн ацы равдыст кӕй уыдзӕн премьерон. Гӕздӕнты авд ӕфсымӕры уӕззау хъысмӕтыл киноныв систа ПТРК "Ир", сӕвӕрдта йӕ театры актер, режиссер Мамиты Григорий.
