ЦХИНВАЛ, 6 май — Sputnik. Президент Тыбылты Леонид балӕвар кодта тренажерон ифтонгад Цхинвалы микрорайон БАМ-ы спортивон зал "Дыргуис" —ӕн.
Микрорайонтӕ БАМ ӕмӕ Дыргуисы фӕсивӕды инициативон къорд бахатыд президентмӕ, цӕмӕй сын баххуыс кӕна спортивон залӕн ифонгад самал кӕнынӕн. Ацы залы тренировкӕ кӕнынц дыууӕ районы фӕсивӕд, афтӕ ма дзы архайы боксы секци дӕр.
Фӕсивӕд цӕмӕ тырныдтой уый сӕ къухы бафтыд. Ног тренажерон ифтонгад конд у 28 иуӕгӕй, уый та ӕвзонг фӕлтӕрӕн фадат ратдзӕн сӕхи цӕттӕ кӕнынӕн спорты бирӕ хуызты.
"Ныфс мӕ ис, фидӕны ацы залтӕй кӕй рацӕудзӕн бирӕ номдзыд спортсментӕ ӕмӕ командӕтӕ", — загъта президент.
Бӕстӕйы сӕргълӕууӕг ма банысан кодта, ӕввахс рӕстӕджы ма ахӕм ифтонгад кӕй балӕвар кӕндзысты ноджы ӕхсӕз спортивон залӕн.
"Азы дӕргъы президенты фондӕй хицӕн ӕрцӕудзӕн финансон фӕрӕзтӕ ноджы ӕхсӕз тренажерон зал сифтонг кӕныны нысанӕн, ацы номхыгъды фыццаг рады ныр та уыдзӕн Знауыры районы Хъорнисы хъӕуы спортивон зал, стӕй та иннӕтӕ. Знауыры поселочы та арӕзт цӕуы футболон фӕзуат", — радзырдта Тыбылты Леонид.
Афтӕ ма президент бахахх кодта, профессионалон спорты размӕцыдӕй дарддӕр ма рох кӕнын кӕй нӕ хъӕуы ирон традицион хъӕзтытӕ дӕр — хъулӕй, рӕттӕй ӕмӕ ӕндӕр адӕмон хъазтытӕ.
