ЦХИНВАЛ, 6 май — Sputnik. Гергиты Валерийы къухдариуæгадӕй Мариинаг театры Симфоникон оркестры концерт ссис фыдмийы ныхмæ ног дзуапп, банысан кодта фæсарæйнаг хъуыддæгты министры хæдивæг Коцты Алан.
Уый зæрдыл æрлæууын кодта, Мариинаг театры оркестр 2008 азы сентябры пырхытӕ Цхинвалы цы концерт ратта, уый.
"Хуссар Ирыстоны абоны онг дæр хъуыды кæнынц, уæды концерт сæм цы æнкъарæнтæ сæвзæрын кодта, уыдон. Эмоционалон æндæвдад уыд тынг ахадгæ. Уыцы музыкæйы зæлтæ цыма адæмы зæрдæты хъæдгæмттæ байгас кодтой, сæ царды æмæ сын сæ фидæны цыма цард бауагътой, афтæ уыд", — загъта коцты Алан.
Æрæджы хæст кæм цыд, уым Гергиты Валерий концерт кæй радта, уый схуыдта символиконыл.
"Рагон Пальмирæйы пырхæнты айзæлыд ныфсы хъæлæс. Стыр символикон нысаниуæг ис уымæн, æмæ ма æрæджы хæстон архæйдтытæ кæм цыд, уым кæй зæлыд Гергиты Валерийы музыкæ", — банысан кодта ФХМ-ы сæргълæууæджы хæдивæг.
Уый ма бахахх кодта, "Уæрæсейы фæрцы Пальмирæ кæй раздæхт адæймагадмæ, кæцы ма æрæджы дæр хъуыды кодта, бынтондæр дзы кæй ницыуал баззайдзæн".
