ЦХИНВАЛ, 19 май — Sputnik. Зынгæ ирон дирижер Гергиты Валерий 19 æмæ 20 майы ратдзæн концерт Концертгебауы оркестримæ, 22 майы та йын уыдзæн концерт Лондонаг симфоникон оркестримæ Лондоны Трафальгары фæзуатыл, фехъусын кодтой РИА Новости Мариинаг театры пресс-службæйы.
Хуыцаубоны Гергиты Валерий слæудзæн Лондонаг симфоникон оркестры пультыл — концерт уагъд цæудзæн Трафальгары фæзуатыл. Ацы проект ссис Лондоны сæйраг культурон цаутæй иу.
Организаторты бахыгъдтæм гæсгæ, æрвылаздæр фæзуатмæ æрбамбырд вæййынц дæс минæй фылдæр аивадуарзӕджы.
Ацы азы концерты программæйы сты Увертюра "1812 год", балет "Лебединое озеро"-йæ Сюита æмæ Чайковскийы "Симфония №4".
Концерты ма оркестримæ хайад райсдзысты Лондоны скæсæйнаг хайы мæгуырдæр районты цæрæг 42 æрыгон музыканты, афтæ ма музыкæ æмæ драмон аивады скъола Гилдхоллы 23 студенты. Ацы социалон акци уагъд цæуы программæ LSO On Track-ы фæлгæтты.
Гергиты Валерий лæууыд Лондонаг симфоникон оркестры сæргъ 2007-2015 азты. Фæстаг дæс азы мидæг маэстро оркестримæ ауагъта 330 концерты афтæ ма райста хайад лейбл LSO Live-ы ныффыстыты.
