ЦХИНВАЛ, 20 май — Sputnik. Хæххон фæндаг Цхинвал-Хъалцентӕйыл аварийы рӕстӕджы цы ӕхсæз уæрæсейаг офицеры фæмард, уыдонӕн Хуссар Иры сараздзысты цырт, загъта президент Тыбылты Леонид Зары фыдохы митингы рӕстӕджы.
Цыппӕрӕмы Цхинвалӕй Ленингормӕ цӕуӕг автобус ахаудта дӕлбыл, аварийы бабын ис 6 ӕфсӕддоны, 16 та фесты уӕззау цæфтæ.
"Уӕрӕсейаг ӕфсӕддонтӕ канд сӕ райгуырӕн бӕстӕйы раз не ‘ххӕст кодтой сӕ хӕс, фӕлӕ ма хъахъхъӕдтой Хуссар Иры сабырдзинад. Ӕмӕ мах ӕнӕмӕнг дӕр бакусдзыстӕм, цӕмӕй ацы ӕфсӕддонты ном сӕнусон кӕнӕм ӕмӕ сын сӕвӕрӕн цырт", — загъта президент.
Уый ма ӕрӕцӕугӕ аварийы фӕдыл тӕфӕрфӕс УФ ӕххӕстбарджын минӕвар Карджиаты Эльбрусӕн.
Раздӕр бӕстӕйы сӕргълӕууӕг бахӕс кодта мидхъуыддӕгты министр Лӕууойты Ӕхсарӕн, цӕмӕй Паддзахадон автоинспекциимӕ ӕмӕ фӕндагон арӕзтады комитетимӕ иумӕ басгарой, авари цы бынаты ӕрцыд, фӕндаджы уыцы фадыг ӕмӕ райсой ӕппӕт мадзӕлттӕ, цӕмӕй фидӕны ахӕм ӕвирхъау цаутӕ мауал ӕрцӕуой ацы фӕндагыл.
