ЦХИНВАЛ, 26 май — Sputnik, Козаты Дианæ. Хуссар Ирыстоны уæвæг уæрæсейаг арæнхъахъхъæнджытæ æртыццæджы ауагътой ерыстæ арæнгæрон æхстæй. Арæнхъахъхъæнджытæ хъуамæ сбæлвырд кодтаиккой, чи сæ у рæстдзæвиндæр гранатæ æппарынæй, кроссæй æмæ автоматæй æхстæй.
Ерыстæ нывонд æрцыдысты Хуссар Ирыстоны уæвæг УФ Æдасдзинады федералон службæйы арæнгæрон управленийы сырæзтыл авд азы сæххæстæн æмæ Уæрæсейы арæнгæрон органтыл 98 азы сæххæстæн.
Арæнхъахъхъæнджытæ ерыс кодтой æртæ дисциплинæйы — 200 метрæй Калашниковы автоматæй æхст, гранатæ æхсын æмæ æххæст гарзифтонгæй æртæ километры кросс.
"Æхстæй ерыстæ нæм уагъд цæуынц æрвылаздæр æмæ сты куыд æвзæрстон этап УФ ÆФС чемпионатмæ, кæцы уагъд æрцæудзæн июлы Ярославлы", — загъта Sputnik чемпионаты сæйраг тæрхонгæнæг, Арæнгæрон управленийы минæвар Александр Смирнов.
Стартмæ разызтысты фондз командæйы, алкæцыйы дæр фæйнæ цыппар адæймаджы. Уыдон хъахъхъæдтой ÆФС-йы Арæнгæрон управленийы Дменис, Ленингор, Знауыр, Дзауы хайадтæ æмæ управленийы аппараты кад.
Æхсынæй хæслæвæрдтæ сæххæст кæныны фæстæ арæнхъахъхъæнджытæ стартмæ рахызтысты æфсæддон формæйы, спортивон къахдарæсы æмæ æххæст гарзифтонгæй, кæцыйы уæз у 10 кг фылдæр. Раздæр дарæсы формæ уыд спортивон. Фæлæ дыууæ азы размæ уагæвæрдмæ бахастой ивындзинæдтæ, цæмæй "æнцон ма уа".
Ерысты фæстиуджытæм гæсгæ, арæнхъахъхъæнджытæ иууылдæр равдыстой хорз цæттæдзинад, иумæйаг командон бахыгъды хуыздæр разынд Дменисы командæ, дыккаг бынат бафтыд Ленингоры хайады къухы, æртыккаг бынат та фæцис Знауыры командæйы.
Хисæрмагонд бахыгъды та аккаг нæ разынд Дменисы хайады кусæг Максим Вежновецæн, дыккаг бынатыл ацыд Ленингоры хайады кусæг Андрей Лебедев, æртыккаг бынатыл та управленийы аппараты минæвар Семен Репинæн.
Уæлахиздзаутæм æнхъæлмæ кастысты хорзæхтæ — грамотæтæ, майдантæ æмæ Арæнгæрон управленийы къухдариуæгады хорзæхтæ.
