ЦХИНВАЛ, 26 май — Sputnik. Хуссар Ирыстон ӕмӕ Цӕгат Кавказы республикӕты ӕхсӕнадон палатӕты къухдариуӕггӕнджытӕ ӕртыццӕджы Дзӕуджыхъӕуы бафыстой ӕмгуыстад ӕмӕ ӕмархайды фӕдыл бадзырд, фехъусын кодта Sputnik РХИ ӕхсӕнадон палатӕйы сӕрдар Джиджойты Анатолий.
Уый банысан кодта, ӕнӕкоммерцион уагдӕтты иумӕйаг архайд сразӕнгард кӕнын бантыст ӕхсӕнадон организаци "Наша Осетия"-йы фӕрцы, цыран ӕрбангом сты 34 националон-культурон центры.
"Раджы хъуыд ӕркӕсын ацы фарстмӕ, цӕмӕй ӕнӕкоммерцион организацитӕ ӕрбангом уой ӕмӕ иумӕ сӕ тыхтӕ радтой сӕ уагдӕтты размӕцыдыл бакусынмӕ. Ныр нын ӕхсӕнадон организаци "Наша Осетия" ӕмӕ Цӕгат Иры ӕхсӕнадон палатӕйы фӕрцы уый бантыст", — загъта Джиджойты Анатолий.
Бадзырды фӕлгӕтты цӕгат-кавказаг авд рӕспубликӕйы ӕмӕ Хуссар Ирыстоны ӕхсӕнадон палатӕты минӕвӕрттӕ иумӕ бакусдзысты граждайнаг ӕхсӕнады райрӕзтыл ӕмӕ ӕхсӕннационалон ахастытӕ сфидар кӕныныл.
