ЦХИНВАЛ, 31 май — Sputnik. Студенткӕ Тъехты Иринӕ рамбылдта Уӕрӕсейы иууыл хуыздӕр хӕбизджынкӕнӕджы ном WorldSkills-2016 чемпионаты хатдзӕгӕгтӕм гӕсгӕ, хъусын кӕны 15 регион.
WorldSkills-2016 чемпионатӕн хатдзӕгтӕ сарӕзтой Подмосковьейы. Ерысты хайад райстой 747 конкурсанты Уӕрӕсейы 64 регионӕй.
"Иууыл хуыздӕрыл банымадтой Тъехты Иринӕйы кӕрдзынтӕ, дыккаг бынат бацахста Ростов-на Донуйы минӕвар ӕмӕ ӕртыккаг призон бынат та адих кодтой Самара ӕмӕ Мӕскуыйы минӕвӕрттӕ", — дзырдӕуы хъусинаджы.
Фыццаг бынаты хицау райста 30 мин сомы, дыккаг — 20, ӕртыккаг бынаты призертӕ та фӕйнӕ 15 мин сомы. Афтӕ ма конкурсанттӕн иууылдӕр радтой фӕндзгай мин сомы.
Чемпионаты ма конкурсы ӕддейӕ архайдта Хуссар Иры бирӕпрофилон колледжы студенткӕ Цхуырбаты Аманда.
Уӕлибых ирон националон къӕбицы у сӕйраг хӕринаг. Ис ын стыр нысаниуӕг — ӕртӕ уӕлибыхӕй ирон адӕм кувынц Хуыцаумӕ, ӕмбӕлынц уазджытыл, дыууӕ уӕлибыхӕй та мысынц сӕ мӕрдты.
