ЦХИНВАЛ, 31 май — Sputnik. Сывæллæтты хъахъхъæныны боны цытæн бæрæгбонон мадзæлттæ уагъд æрцæудзысты æртыццæджы Цхинвалы централон фæзуатыл, фехъусын кодтой Sputnik фæсивæдон политикæ, спорт æмæ туризмы фæдыл комитеты пресс-службæйы.
"1 июны 11 сахатыл театралон фæзуатыл уагъд æрцæудзысты хиирхæфсæн мадзæлттæ — традицион "асфальтыл ныв" æмæ "хъæлдзæг старттæ", уыдон рæстæджы уæлахиздзаутæн лæвæрд цæудзысты призтæ æмæ хорзæхтæ. Театралон фæзуатыл ма уагъд æрцæудзæн бæрæгбонон концерт сывæллæтты хайадистæй", — банысан кодтой пресс-службæйы.
Сывæллæттæ хъахъхъæныны бонмæ ма йæ программæ бацæттæ кодта Сывæллæтты сфæлдыстадон галуан дæр — ауаддзæн сæрмагонд акци "Хæлары мидбылхудт", кӕцыйы фæлгæтты ССГ-ы ахуыргæнджытæ æмæ хъомылгæнинæгтæ бабæрæг кæндзысты республикон рынчындоны хоскæнынад цы сывæллæттæ цæуынц, уыдоны.
"Мах бацæттæ кодтам сывæллæттæн алыгъуызон хиирхæфсæн мадзæлттæ — хъæзтытæ æмæ призтæ. Мадзæлтты хайад райсыны фадат цы сывæллæттæн нæй, уыдонæн нæ фæнды чысыл бæрæгбон рынчындоны саразын", — загъта галуаны кусæг.
Сывӕллӕтты хъахъхъӕныны ӕхсӕнадӕмон бон нысан цӕуы 1 июны. Бӕрӕгбон уадзыны тыххӕй уынаффӕ райстӕуыд 1925 азы Ӕппӕтдунейон конференцийы рӕстӕджы.
