ЦХИНВАЛ, 1 июн — Sputnik. Цхинвалы сывæллæтты сфæлдыстадон галуаны хъомылгæнинæгтæ акци "Хæлары мидбылхудт"-ы фæлгæтты бæрæгбонон арфæ ракодтой, Республикон рынчындоны цы чысыл пациенттæ хуыссы æмæ сæ рынчыны тыххæй бæрæгбонон мадзæлтты хайад райсыны фадат кæмæн нæ уыд, уыдонæн.
Хъæлдзæг карнавалон костюмты галуаны хъомылгæнинæгтæ азылдысты алы палатæйыл дæр æмæ алы сывæллонæн дæр арфæйы ныхæстимæ радтой лæвæрттæ.
"Нæ ногдзаутæ бацæттæ кодтой лæвæрттæ хъарм ныхæстимæ фыстæджытимæ, цæмæй ма æнкъард кæной, ацы бæрæгбон сæ рынчындоны кæй æрæййæфта, уый тыххæй", — загъта галуаны кусæг.
Уый ма банысан кодта, ацы аз ацы акци уагъд кæй цæуы фыццаг хатт æмæ равдыста ныфс, кæй суыдзæн æрвылазон.
"Хорз хъуыддаг аразын алыхатт дæр æхсызгон у. Æхсызгон та нын уæд тынгдæр вæййы, æмæ сывæллæтты цæсгæмттыл дисы æнкъарæнты фæстæ кæй райхæлы хъæлдзæг мидбылхудт", — бафтыдта ахуыргæнæг.
Чысыл пациентты ныййарджытæн дæр æхсызгон уыд ахæм хъусдард акцийы организаторты æрдыгæй.
"Фæнды мæ бузныджы ныхæстæ зæгъын хайадисджытæн æмæ акцийы организатортæн, кæй нын балæвар кодтой ахæм ирд тæлмæнтæ ацы бæрæгбоны. Уадз æмæ æппæт дунейы сывæллæттæ уæт кæддæриддæр æнæниз", — загъта ныййарджытæй сæ иу.
Хуссар Ирыстоны æртыццæджы ацыдысты бæрæгбонон мадзæлттæ, кæцытæ нывонд уыдысты Сывæллæтты хъахъхъæнынады бонæн. Театралон фæзуатыл уагъд æрцыдысты сывæллæтты нывы конкурс, флэш — моб, хъæзтытæ æмæ кафтытæ.
