Сывæллæтты нывты конкурс, флеш-моб, хъæзтытæ æмæ кафтытæй банысан кодтой Цхинвалы Сывæллæтты хъахъхъæнынады æхсæнадæмон бон. Цхинвалы Театралон фæзуатыл райсомæй зæлыд музыкæ æмæ сывæллæтты зарджытæ.
Рæсугъд фæлынд сабитӕ сæ ныййарджытимæ æмæ сабидæтты хъомылгæнинæгты къордтæй азмæлæн дæр нал уыд фæзуатыл. Мадзаламонæгæн сывæллӕтты ирхæфсынæн æххуыс кодтой хъæлдзæг клоунтæ. Райдианы сывæллæттæн байуæрстой хъулон мелтæ, æмæ асфальт æвиппайды байдзаг алыгъуызон нывтæй.
Дæргъвæтин радтæ сырæзт адджын бæмбæг, попкорн æмæ тымбылæгтæм. Алы сывæллонæн дæр байуæрстой бæрæгбонон колпактæ. Республикæйы чысыл æмбæстæгтæн сæ бæрæгбоны цытæн раарфæ кодта Хуссар Ирыстоны президент Тыбылты Леонид дæр.
Цхинвалы сывæллæтты сфæлдыстадон галуаны хъомылгæнинæгтæ "Хæлары мидбылхудт"-ы фæлгæтт ыхъæлдзæг карнавалон костюмты азылдысты алы палатæйыл дæр æмæ алы сывæллонæн дæр арфæйы ныхæстимæ радтой лæвæрттæ.
"Нæ ногдзаутæ бацæттæ кодтой лæвæрттæ хъарм ныхæстимæ фыстæджытимæ, цæмæй ма æнкъард кæной, ацы бæрæгбон сæ рынчындоны кæй æрæййæфта, уый тыххæй", — загъта галуаны кусæг.
Уый ма банысан кодта, ацы аз ацы акци уагъд кæй цæуы фыццаг хатт.
