ЦХИНВАЛ, 7 июн — Sputnik. Йӕ цардӕй ахицӕн коллекционер, бизнесмен, Петербурджы "Ног музей"-йы бындурӕвӕрӕг Чехойты Аслан, хъусын кӕнынц питераг дзыллон информацион фӕрӕзтӕ.
Чехойты Аслан амард мӕскуыйаг клиникӕтӕй сӕ иуы. РЦИ-Аланийы цӕгат-ныгуылӕн федералон зылды минӕвӕрады куыд хъусын кӕнынц, афтӕмӕй зиан бавӕрдзысты Петербурджы.
Чехойты Аслан уыд Уӕрӕсейы аивӕдты академийы кадджын академик.
Нырыккон аивадмӕ Чехойты Аслан йӕ хъусдард аздӕхта 1990 ӕзы ӕмӕ уымӕй фӕстӕмӕ ӕлхӕдта нывтӕ куыд нывгӕнджытӕй, афтӕ дунейон аукционты.
Йӕ коллекцийы ис Оскар Рабин, Евгений Михнов-Войтенко, Владислав Мамышев-Монро ӕмӕ ӕндӕр зындгонд авторты куыстытӕ.
Чехойты Асланы музейы уыд нырыккон аивады фыццаг гом коллекци Петербурджы, уымӕн бындур ӕвӕрд ӕрцыд музей "Эрарты"-йӕн цалдӕр мӕй раздӕр.
Чехойты Иналы фырт Аслан райгуырд Цхинвалы 1965 азы. Каст фӕци Ленинграды фыццаг медицинон институт. 1990 азы онг куыста дохтырӕй, стӕй ахызт бизнесмӕ. Уӕд райдыдта коллекци кӕнын советон нонконформистстон аивад.
