ЦХИНВАЛ, 8 июн — Sputnik. Ирон футболист Джанайты Сослан журнал "Огонек"-ы хатдзӕгтӕм гӕсгӕ ссис Лев Яшины номыл конкурс "Вратарь года"-йы уӕлахиздзау, хъусын кӕны Осетия Times.
"Уӕрӕсейы чемпионаты ныры сезоны Джанайты Сослан архайдта 30 матчы, кӕцыты ӕмткӕй бауагъта ӕрмӕстдӕр 20 пуртийы. Журнал "Огонек" ӕнтысджындӕр футболистты рабӕрӕг кӕны экспертты, журналы кӕсджыты ӕмӕ йӕ редакцийы кусджыты иумӕйаг фӕндонмӕ гӕсгӕ", — дзырдӕуы хъусинаджы.
Уымӕй дарддӕр ма Уӕрӕсейы футболы цӕдис раргом кодта бӕстӕйы хуыздӕр футболистты номхыгъд. Уӕрӕсейы 33 хуыздӕр футболистты ‘хсӕн ис дыууӕ ирон хъазӕджы — Зӕгъойты Алан у хуыздӕр галиуфарсон хъахъхъӕнӕг ӕмӕ Джанайты Сослан та Игорь Акинфеев ӕмӕ Маринато Гилермейы фӕстӕ чемпионаты хуыздӕр дуаргӕс.
Джанайты Тотрадзы фырт Сослан райгуырд Цӕгат Ирыстоны 1987 азы. 29-аздзыд ирон футболист у клуб "Ростов"-ы дуаргӕс.
Приз "Вратарь года" лӕвӕрд цӕуы 1960 азӕй фӕстӕмӕ, фыццаг ӕй райста легендарон Лев Яшин. Аст хатты та ацы конкурсы уӕлахиздзау ссис Игорь Акинфеев, клуб "Ростов"-ы хъазджытӕй фыццаг ацы хорзӕх бафтыд Джанайты Сосланы къухы.
