ЦХИНВАЛ, 10 июн — Sputnik. Дыууӕ сӕрдыгон лагеры бакӕндзӕн ацы аз ахуырады министрад Хуссар Ирыстоны, уыдоны ӕмткӕй баулӕфдзӕн 600 сывӕллоны, фехъусын кодта Sputnik министрады пресс-секретарь Плиты Яна.
"Цхинвалы скъола-интернат ӕмӕ Дзауы районы Гуфтайы скъолайы сывӕллӕттӕ баулӕфдзысты ӕртыгай къордтӕй. Дыууӕ лагеры дӕр ӕмрӕстӕджы улӕфдзӕн фӕйнӕ 100 скъоладзауы, стӕй сӕ раивдзӕн дыккаг ӕмӕ уый фӕстӕ та ӕртыккаг къорд", — загъта Плиты Яна.
Уый ма банысан кодта, сывӕллӕттӕ кӕй уыдзысты ӕппынӕдзух хъусдарды бын ӕмӕ сын арӕзт ӕрцӕудзӕн хъӕзныг ахуырадон ӕмӕ хиирхӕфсӕн нывӕзт.
Цхинвалы скъола-интернат ӕмӕ Дзауы районы Гуфтайы сколайы бындурыл ахуырады министрад ӕрвыл аз дӕр бакӕны сӕрдыгон лагертӕ. Хъыгагӕн, ивгъуыд ӕзты Сывӕллӕтты сфӕлдыстадон галуаны цы лагерь уӕвынад кодта, уый ацы аз нӕ байгом уыдзӕн, галуаны алыварс территори — Ногдзауты парк, Ӕрыгон техникты станц ӕмӕ Паддзахадон театры арӕзтадон куыстытӕ кӕй цӕуы, уый аххосагӕн.
