ЦХИНВАЛ, 14 июн — Sputnik. Уæлдай тасӕй ирвæзынгæнæн операцитæ уадзыны центр "Лидер"-ы кусджытæ басгæрстой дыууæ гектарæй фылдæр территори, фехъусын кодтой УФ УУМ-ы пресс-службæйы.
Центр "Лидер"-ы къорд, кæцы æрцыд республикæмæ ивгъуыд къуырийы райдианы, дарддæр уадзы республикæйы территори минæтæй ссыгъдæг кæныны куыстытæ.
Специалистты ныхæстæм гæсгæ, куыстытæ æххæстæй уадзын хъыг дарынц ацы территорийыл бырæтты рæдзæгъдтæ. Ам æрæмбырд тынг бирæ æфсæйнагæй бырæттæ, кæцытæ æндавынц детекторы куыстыл, сгарын та хъæуы алы "дзæнгæрæг" дæр.
"Ивгъуыд суткæйы мидæг дæлбулкъон Анатолий Саввины къухдариуæгады бын къорд ауагъта пиротехникон куыстытæ, минæтæ раргом кæныны æмæ сæнæзианхъом кæныны нысанæн. Иу суткæйы мидæг басгæрст æрцыд 21900 (2,19 Га) бæрц территори, рæмудзæн æрмæджытæ не ссардæуыд", — банысан кодтой уæрæсейаг уæлвæткон ведомствӕйы.
Æдæппæт иу къуыримæ басгæрст æрцыд 21900 (2,19 Га) бæрц территори, ссардæуыд дыууæ рæмудзæн æрмæджы.
Республикæмæ æрцыдысты 30 адæймаджы — уæлдай тасӕй ирвæзынгæнæн операцитæ уадзыны центр "Лидер"-ы кусджытæ. Се сконды сты фæлтæрдджын пиротехниктæ, кинологтæ, робототехникон управленийы специалисттæ æмæ медицинон кусджытæ. "Лидер"-ы кусджытæ Хуссар Ирмæ æрцыдысты 80 боны æмгъуыдмæ, уыцы рæстæгмæ уыдон хъуамæ ссыгъдæг кæной 40 мин гектары минæтæй.
