ЦХИНВАЛ, 15 июн — Sputnik. Хуссар Ирыстоны минæвæрттæ хайад райсдзысты XX Петербургаг æхсæнадæмон экономикон форумы (ПÆЭФ), хъусын кæны республикæйы хицауады официалон сайт.
Хуссарирыстойнаг делегацийы скондмæ бацыдысты Хуссар Ирыстоны минæвар УФ-йы Гасситы Знауыр, финансты министр Хæбæлаты Азæ æмæ экономикон райрæзты министр Зæгъойты Вильям.
Информацион агентад æмæ радио Sputnik суыдзæн юбилейон XX Петербургаг æхсæнадæмон экономикон форумы æхсæнадæмон информацион партнер, кæцы уагъд цæудзæн 2016 азы 16-18 июны Санкт-Петербурджы. Мадзалы цыды фæдыл информаци уыдзæн 24/7 режимы Sputnik порталтыл, кæцытæ кусынц 30 æвзагæй фылдæрыл.
Форумы хуссарирыстойнаг делегацийы уæнгтимæ ис агентад Sputnik Хуссар Ирыстоны уацхæссæг дæр, кæцы нын дæтдзæн бæлвырд информаци.
"Хуссар Ирыстонæн ацы мадзалы хайадист ратдзæн фадат потенциалон инвесторты ссарын æмæ Уæрæсейы Федерацийы паддзахадон хицауады органты минæвæрттимæ бастдзинæдтæ сфидар кæнын", — загъта экономикон райрæзты министр Зæгъойты Вильям.
ПÆЭФ у æрвылазон амалхъом мадзал экономикон къабазы, цы ран хайад райсынц минæвæрттæ 60 бæстæйæ фылдæр, уыдон нымæцы уæрæсейаг æмæ фæсарæйнаг стырдæр компаниты къухдариуæггæнджытæ, паддзахæдты æмæ хицауадты сæргълæуджытæ, политикон разамонджытæ, Уæрæсейы алы регионты бизнес-æмæхсæнадты минæвæрттæ.
"Форумы хайадист фадат дæтты бастдзинæдтæ фидар кæнын, стереотиптæ иуварс кæнын, интересты къабаз уæрæхдæр кæнынӕн. Ныфс мæ ис æмæ форумы нæ хайадистæн кæй уыдзæн фæстиуджытæ æмæ нын уыдзæн йæ хатдзæгты тыххæй зæгъинæгтæ", — загъта Зæгъойты Вильям.
Петербургаг æхсæнадæмон экономикон форумы (ПÆЭФ) у уникалон цау экономикæ æмæ бизнесы дунейы. Ивгъуыд дæс азы форум ссис раззагондæр фæзуат, цы ран æрæмбырд вæййынц амалхъом адæм æмæ цы ран уынаффæтæ цæуынц Уæрæсейы æмæ дунейы размæцæугæ бæстæты раз лæууæг ахсджиаг экономикон фарстытыл.
