ЦХИНВАЛ, 15 июн — Sputnik, Босыкты Наталья. Уæрæсейы бонæн нывонд чиныджы фестиваль уагъд цæуы Цхинвалы.
Æрбацæуджытыл бацæуæны æмбæлынц Сывæллæты сфæлдыстадон галуаны хъомылгæнинæгтæ. Уыдон хатынц уазджытæм тест рацæуын.
Чингуыты армукъайы уæлдай, ацы фестивалы чиныг лæвар нæ кæнынц, фæлæ йæ хъæуы рамбулын 15 фарстæн раст дзуапп ратгæйæ æмæ бонустæ райсгæйæ.
Sputnik уацхæссæг дæр райста хайад викторинæйы.
Фарстытæ сæйраджыдæр хауынц уырыссаг æвзаджы грамматикæмæ. Викторинæйы фарстытæн фондз раст дзуаппæн чиныг дæттынц 30% асламдæрæй.
Фестивалы ис уæрæсейаг классикты, ирон авторты уацмыстæ. Уыдоны æхсæн Джанайты Славайы чиныг "Хуыцауы æртæ цæссыджы", кæцыйæн ссарæн никуы ис. 1000 экземплярæй рацæугæ чиныджы аргъ у 8 мин сомы, бонустимæ та — 7 мин сомы.
Æрбацæуджытæй иу куыд загъта, афтæмæй ахæм фестивальтæ сты ахъаз сæрмагонд библиотекæ фæхъæздыгдæр кæнынæн.
"Нырыккон æхсæнады чиныг фæрсгæ дæр нал кæнынц. Чиныг асламдæрæй цы викторинæйы фæрцы ис балхæнæн, уый у иттæг хорз фадат цымыдисон литературæ балхæнынæн",- загъта уый.
Чиныджы фестиваль уагъд цæуы Сталины уынгыл, æфсæддон-патриотикон мадзæлттæ организаци кæнын æмæ уадзыны фæдыл штабы.
Фестивалы организатор у президенты паддзахадон уынаффæгæнæг Зассеты Жаннæ.
