ЦХИНВАЛ, 17 июн — Sputnik. Хуссарирыстойнаг дзулфыцæн комбинат фæуæрæхдæр кодта йæ ассортимент æнахуыр продукты хуызæй. Кондад райдыдта уадзын мацъони.
Хуссар Ирыстоны популярон урсаджы продукт балхæнæн уыд раздæр дæр — Уæрæсейæ æрбаласгæ дӕр æмæ бынæттон дæр — хæдзарон уавæрты арæзт.
Фыццаг хатт Цхинвалы дуканиты (кæд æмæ чысыл гуырахстæй, уæддæр) ис фадат балхæнын заводы уагъд бынæттон мацъони. Урсаджы продукт хуыйны "Знауыраг æхсыр", арæзт у бынæттон æхсырæй.
Дзулфыцæн комбинаты директор Цхуырбаты Вадим куыд радзырдта, афтæмæй кондад сарæзта бадзырд зæхкусæгон-фермерон хæдзарады сæргълæууæг Гобозты Аланимæ.
"Ныры этапыл мацонийы рауагъд нырма хæссы эксперименталон нысаниуæг. Мах сарæзтам бадзырд фермер Гобозты Аланимæ, кæцы ифтонг кæны натуралон знауыраг æхсырæй Цхинвал", — банысан кодта уый.
Цхуырбаты Вадимы ныхæстæм гæсгæ, продукт арæзт у традицион технологимæ гæсгæ æмæ дзуапп дæтты æнæмæнгхъæуæг домæнтæн. Æрвылбон горæты базарадон объекттæм баласынц 100 банкæйæ фылдæр мацъони.
Уарзон урсаджы продукт балхæнæн ис 0,3л пластикон æвгты 30 сомæй æмæ 0,5л авджын банкæйы 50 сомæй. Мацъонийы æмгъуыд у фондз суткæйы.
Мацъони кæд æрæджы райдыдтой уадзын, уæддæр бынæттон продукт зæрдиагæй агурынц фæлхасгæнджытæ.
Директоры ныхæстæм гæсгæ, куыстуат ивгъуыд мæй йæ кондад фæуæрæхдæр кодтой æртæ хатты. Куыстуаты æввахс нывæзты ис кондадон гуырахст фæуæрæхдæр кæнын бынæттон амалиуæггæнджыты фæрцы.
"Раздæр, Гобозты Аланимæ фембæлды рæстæджы мах бацæттæ кодтам кондад фæуæрæхдæр кæныны нывæзт. Фæнды нæ уадзын къæдор, æхсырысæртæ æмæ нæлхæ. Фæнды нæ хисæрмагонд амалиуæггæнджытимæ кусын", — радзырдта Цхуырбаты Вадим.
Уый банысан кодта, урсаджы продукцийы фæдыл проект кæй бантыст сæххæст кæнын фермертæ, амалиуæггæнджытæ æмæ дзулфыцæн комбинаты æнтыстджын æмгуыстады фæрцы.
