ЦХИНВАЛ, 21 июн — Sputnik. Алайнаг епархи кӕронмӕ бакӕндзӕн Къуаисайы ӕрдӕгарӕзт аргъуаны арӕзтадон куыстытӕ, фехъусын кодта Sputnik епархийы сӕргълӕууӕг, фыд Иаков Хетӕгкаты.
Сыгъдӕг Георгийы аргъуаны арӕзтадӕн Къуаисайы бындур ӕрӕвӕрдта амалиуӕггӕнӕг Джуссойты Альберт, фӕлӕ йын цӕмӕдӕр гӕсгӕ нӕ бантыст йӕ фӕуын. Систӕ амад ӕрцыдысты, фӕлӕ бӕстыхай агъуысты бын нӕ фӕци.
"Ныр ацы горӕтӕй рацӕугӕ бизнесментӕн сӕхи бафӕндыд аргъуаны арӕзтадӕн баххуыс кӕнын. Ӕввахс рӕстӕджы ӕрывналдзыстӕм куыстытӕм ӕмӕ, Хуыцауы фӕрцы, Къуаисайы дӕр фӕзындзӕн ног аргъуан", — радзырдта динамонӕг.
Афтӕма Алайнаг епархи ныртӕккӕ аразы аргъуан Ленингоры дӕр. Арӕзтад райдыдта апрелы ӕмӕ сентябрьмӕ хъуамӕ кӕронмӕ бахӕццӕ уа. Фыд Иаков куыд загъта, афтӕмӕй 21 сентябры, Фырсыгъдӕг Мады Майрӕмы райгуырды бӕрӕгбоны Ленигоры Хуыцаумӕ скуывдтӕ ауадздзысты ног арӕзт аргъуаны.
