ЦХИНВАЛ, 21 июн — Sputnik, Хъотайты Мария. Рауагъдонты бал Цхинвалы уагъд æрцыд Хуссар Ирыстоны хицауады æмбырдты залы. Зноны скъоладзаутæ цытджын æгъдауæй тезгъо кодтой сæ ахуыргæнджытæ æмæ рæсугъд фæлынд æмкъласонтимæ сырх гауызыл дидинджытæй æрдынæджы бын. Рæсугъд чызджытӕ ӕмӕ лӕппуты дыууæварс дæр æрæмбырд сты рауагъдонты цинæйдзаг ныййарджытæ, кæстæр хотæ æмæ æфсымæртæ, кæцытæ сæ истой мобилон телефонты камерæйæ.
Залмæ бахауыны фадат алкæмæн нæ фæцис, бахизæн хъахъхъæдтой милицийы кусджытæ. Сырх гауызы кæрон рауагъдонтыл æмбæлд республикæйы президент Тыбылты Леонид, кæцыйæн уыдон дзырд дæттой, республикæ æмбæлон æмвæзадыл кӕй æвдисдзысты уæрæсейаг уæлдæр ахуырадон уагдæтты ахуыры рæстæджы.
Президент раарфæ кодта хуссарирыстойнаг рауагъдонтæн æмæ зæрдыл æрлæууын кодта ахуыргæнджыты хайбавæрд сæ ахуырад æмæ хъомыладмæ.
"Рауагъдонтæй бирæтæ ныридæгæн ссисты уæрæсейаг уæлдæр ахуырадон уагдæтты студенттæ. Мæ зæрдæ сын зæгъы стыр æнтыстытæ сæ ахуыры æмæ пайдаджын зонындзинæдтæ исыны хъуыддаджы, кæцытæй уыдон спайда кæндзысты сæ райгуырæн бæстæйы хорзæн. Æнхъæлмæ уæм кæсæм уæ ахуыры кæрон", — загъта президент.
Уый банысан кодта, дипломтæ райсыны фæстæ уыдонæн кæй разындзæн куысты бынæттæ, уымæн æмæ республикæ æййафы хъуагдзинад хорз специалисттӕй.
Рауагъдон чызджыты рæсугъд къабатæ, макияж æмæ прическæтæ, даргъ хъусдарӕнтӕ æмæ уæззау кольетæ — иууылдæр дзурæг уыдысты ууыл æмæ сæхи лæмбынæг кæй бацæттæ кодтой ацы стыр бæрæгбонмæ. Рауагъдонтæ арæзтой бирæ "селфи"-тæ, цæмæй сæ фæстæдæр адих кæной социалон хызæгты.
Рауагъдонты бал адарддæр бæрæгбонон концертæй — сценæйыл сæ арæхстдзинад æвдыстой ансамбль "Симд", нырыккон кафты брейк-данс студи. Тынг фæцыд ӕрӕмбырдуӕвджыты зӕрдӕмӕ чысыл джентльменты кафт. Мадзалы кульминаци ссис стыр бæрæгбонон торт, кæцы рахастой сценæмæ. Йæ цырæгътæ ахуыссын кæнынæн бахъуыд рауагъдонтæн сæ фылдæр хайы тыхтæ.
Зноны скъоладзаутæ æмæ цæрæнбонтæм æмкъласонтæ нысан кодтой скъолайæ рауагъд æмæ ног цардмæ бахызт суанг æмбисæхсæвмæ. Æввахс рæстæджы уыдон апырх уыдзысты алыгъуызон горæттæ æмæ ахуырадон уагдæттæм. Рауагъдон бал ста уыдон бирæ æзты мысдзысты æмкъласонты æрвылазон фембæлдты рæстæджы.
