ЦХИНВАЛ, 21 июн — Sputnik. Хуссар Ирыстоны сывæллæтты ансамбль "Кафт" ссис æхсæнадæмон фестиваль "Черноморский Олимп"-ы гран-прийы хицау, кæцы уагъд цыд 14-20 июны Сочийы. Уæлахиздзауты автобусыл æмбæлдысты дыккæгæм скъолайы кæрты сæ ныййарджытæ æмæ ахуыргæнджытæ традицион æртæ уæлибых æмæ ирон бæгæныимæ.
"Мах æмбæлæм нæ сывæллæттыл, кæцытæ æрцыдысты уæлахизимæ. Цины æнкъарæнтæ ныл афтæ стых сты æмæ ныхæстæ дæр нæй. Стæм сæрыстыр нæ сывæллæтты æнтыстæй æмæ стыр бузныг зæгъæм ансамблы къухдариуæгад æмæ РХИ президентæн, кæцыйы фæрцы ацы балц ссис реалон", — загъта хайадисджытæй иуы ныййарæг.
Фæллад, фæлæ цины æнкъарæнтæй йемыдзаг сывæллæттæ дисы бафтыдысты уыйбæрц адæмæй. Хуссарирыстойнаг ансамбль конкурсы сæххæст кодта националон кафт Симд æмæ Хонгæ. Курдиат æмæ аив кафтæн жюрийы уæнгтæ скодтой тынг бæрзонд аргъ — сывæллæттæн лæвæрд æрцыд фестивалы гран-при "Адæмон кафты" номинацийы.
"Æнхъæл нæ уыдтæн, фестивалы нын ахæм æнтыст кæй уыдзæн. Фæлæ жюрийы уæнгтæ бæрзонд аргъ скодтой хайадисджыты курдиат æмæ костюмтæн", — загъта ансамблы къухдариуæггæнæг Майя Четион.
Фестивалы уагæвæрдмæ гæсгæ, коллектив бацæттæ кодта видеоролик, цыран æвдыст æрцыдысты Хуссар Ирыстоны аив бынæттæ.
"Нæ ролик бахауд конкурсы иууыл хуыздæр роликты нымæцмæ, уый фæдыл мах хорзæхджын æрцыдыстæм кады грамотæйæ", — бафтыдта Четион.
Ансамблы къухдариуæггæнæг банысан кодта, йæ хъомылгæнинæгты къухты конкурсы гран-при кæй æфты дыууæ азы фæд-фæдыл.
Фестивалы хайад райстой 27 коллективы Уæрæсейы алы къуымтæй, кæцытæ сæ арæхстдзинад æвдыстой æндæр æмæ æндæр номинациты. Фестивалы организатор уыд сывæллæттæ æмæ фæсивæды сфæлдыстадон æмæ гоймагон райрæзты æхсæнадæмон проекты координатор "Дети 21 века".
