ЦХИНВАЛ, 23 июн — Sputnik. Хуссар Ирыстоны сывæллæтты боксы скъолайы хъомылгæнинæгтæ рамбылдтой олимпиаг призер Давид Айрапетяны номыл гом ерысты Кубок.
Гом ерыстӕ уагъд цыдысты Кисловодскы, архайдтой дзы Цæгат Кавказы æппæт республикæты æрыгон боксертæ дӕр, æдӕппæтæй 130 спортсмены бæрц. Хуссар Ирæй ерыстæм ацыдысты аст ӕвзонг боксеры, уыдонæй фондзæй ссисты уæлахиздзаутæ, дыууæйæ та ӕрхастой ӕвзист майдантӕ.
Ерысты размæ Хуссар æмæ Цæгат Ирыстоны иугӕнӕг фæндаг — Транскам ӕрыхгӕдтой дуры зæйты рацыды фӕстиуӕгӕн æмæ тæссаг уыд, сывæллæттæ ерыстӕм куыннӕ бахауой, уымæй. Куыддæр æхсæв дыууадӕс сахатыл фæндаг байгом, афтæмæй боксерты къорд араст ерыстæм.
"Тынг фидар спортивон цæттæдзинад æмæ удыхъæд равдыстой нæ чысыл боксертæ. Ӕхсæв афæндараст стæм æмæ тæккæ ерысты райдайæнмæ ныххæццæ стӕм. Фынӕйхъӕлдзӕг ӕмӕ фӕлладмӕ ӕнӕкæсгæйæ сывӕллӕттӕ сæхи равдыстой тынг хорз æмæ сæ иууылдæр стæм сæрыстыр", — радзырдта Sputnik скъолайы директор Кокойты Мурӕт.
Хуссар Иры командæ иумӕйагӕй йе ‘нтыстджын архайды тыххæй райста ерысты кæстæр къорды кубок. Хицæн уæзы категориты уæлахиздзаутæ ссисты Багаты Марат, Гæджиты Гурам, Ӕлборты Сослан, Бибылты Сергей æмæ Кокойты Эдуард, æвзист майдантæ та рамбылдтой Кокойты Аслан æмæ Мæргъиты Игорь.
"Ерыстæ цыдысты боксӕй УФ олимпиаг æмбырдгонды цæттæгæнæн базæйы æмæ нӕ лӕппутӕн фадат уыд Уæрæсейы хуыздæр боксертимæ базонгæ кӕнынӕн. Фæлтæрд спортсментыл æвæрццаг тæлмæнтæ ныууагътой цхинвайлаг чысыл боксертæ", — радзырдта боксы скъолайы кусæг Кокойты Ирбег.
Уый ма банысан кодта, скъолайы къухдариуӕгад райгонд кӕй у тренерты куыст æмæ хъомылгæнинæгты æнтыстытæй, æрмæстдæр тыхсынц, чысыл боксертæн ринг кæй нæй, уымæй.
"Кусæм фæндзæм скъолайы бæстыхайы. Ринг нæхæдæг самал кæниккам, фæлæ скъолайæн сӕ спортивон зал сæхи дæр хъæуы æмæ нын кæйдæр агъуысты ринг сæвæрыны бар нæй. Тынг бæллæм, сывæллæттæн æппæтæй ифтонг зал саразын нын куы бантысид", — банысан кодта Ирбег.
Чысыл боксертæ Кисловодскы ӕнтысты фӕстӕ ныр та хуынд æрцыдысты цæттæгæнæн сбортæм августы. Уæдмæ та скъолайы иууыл фæлтæрддæр боксертæй иу Дзӕгъиаты Ацӕмӕз стох кæндзæн "Юность России"-йы ерысты.
Спортсменты цæттæ кæнынц теренертæ Кокойты Мурӕт, Дзигойты Ацæмæз æмæ Тедеты Александр. Ерыстæм ацæуынæн сын финансон æххуыс бакодта президент Тыбылты Леонид.
