ЦХИНВАЛ, 24 июн — Sputnik. Националон музей равдисдзæн ног экспозици, кæцы нывонд у ирон адæмы геноцидæн.
Экспозици æвæрд уыдзæн хæстон кады хайады, цы ран равдисдзысты геноциды бæлвырдгæнæнтæ, фехъусын кодта Sputnik нацмузейы пресс-секретарь Дзуццаты Тамарæ.
"Мах æмбырд кæнæм документалон æмæ фыст бæлвырдгæнæнтæ, кæцытæ бавзæрстой 1991 — 2008 азты хæсты фыдæвзарæнтæ. Ам æвæрд уыдзысты Америкæйы уагъд хæстæрмæджытæ, кæцытæ спырх сты Хуссар Иры территорийыл 2008 азы æмæ æндæртæ", — радзырдта уый.
Пресс-секретарь бафтыдта, музей кæй фæнд кæны рахицæн кæнын экспозицийæн хицæн бæстыхай нырыккон техникæимæ, кæцы цæттæ уыдзæн Фыдохы бонмæ — 8 августмæ. Уыцы бон Гуырдзыстон райдыдта æххæстмасштабон æфсæддон архæйдтытæ Хуссар Иры ныхмæ.
Дзуццаты Тамарæйы ныхæстæм гæсгæ, информаци æмæ буарадон бæлвырдгæнæнтæ æмбырд кæнын рæстæджы сын стыр æххуыс бакодтой РХИ Мидхъуыддæгты министрад æмæ прокуратурæ.
