ЦХИНВАЛ, 7 июл — Sputnik. Хуссарирыстойнаг ӕрыгон политиктӕ ӕмӕ ӕхсӕнадон архайджытӕ араст сты форуммӕ "Территория смыслов на Клязьме", цы ран сын фадат уыдзӕн паддзахадон сферӕйы профессионалон зонындзинӕдты сусӕгдзинӕдтӕ базонынӕн, фехъусын кодтой Sputnik фӕсивӕдон политикӕйы фӕдыл комитеты.
"Республикӕйы президенты администрацийы кусджытӕ Тыбылты Алан ӕмӕ Тыбылты Демури, афтӕ ма организаци "Иры Сомбон"-ы минӕвӕрттӕ Плиты Андрей ӕмӕ Хозиты Вячеслав ацыдысты форуммӕ Хуссар Ирӕй. Форум дӕтты хорз фадӕттӕ ӕрыгон политиктӕн ӕрыгон лидерты потенциал реализаци кӕныны хъуыддаджы ӕхсӕнадон — политикон къабазы, афтӕ ма профессионалон зонындзинӕдтыл хӕст кӕнын, бӕрндзинад хӕссын ӕмӕ политикон партийы сконды уӕвынадмӕ ӕнӕкӕсгӕйӕ, командӕйы кусын",- загътой комитеты.
Ӕндӕр ӕмӕ ӕндӕр бӕстӕтӕй хайадисджытӕ фыццаг сменӕйы фондз бонмӕ ахуыр кӕндзысты паддзахадон ӕмӕ партион фӕсивӕдон политикӕйы бындуртӕ. Практикон ахуырты хатдзӕгтӕм кӕсгӕ, хайадисджытӕ хъуамӕ бакусой паддзахадон фӕсивӕдон политикӕйы реализаци кӕныны фӕдыл мадзӕлтты программӕйыл, кӕцы хъуамӕ ӕрцӕуа ӕвӕрд паддзахадон программӕ "Уӕрӕсейы фӕсивӕд"-ы бындуры.
"Мах ма форумы уыдыстӕм фарон дӕр. Ӕрыгон политиктӕ ӕндӕр ӕмӕ ӕндӕр горӕттӕ ӕмӕ организацитӕй зонгӕ кӕнынц кӕрӕдзиимӕ, цымыдис кӕнынц, регионты ӕмӕ стыр горӕтты цы программӕтӕ ист цӕуынц фӕсивӕдон организациты райрӕзтӕн",- загъта Плиты Андрей, кӕцы дыккаг хатт исы хайад форумы куысты.
Ӕхсӕнадон архайӕджы ныхӕстӕм гӕсгӕ, фарон форумы раныхас кодтой ахӕм зындгонд политиктӕ, куыд, Геннадий Зюганов, Сергей Неверов, Владимир Жириновский.
"Мӕ нымадмӕ гӕсгӕ, райсгӕ зонындзинӕдтӕ ӕмӕ фӕлтӕрддзинадӕй спайда гӕнӕн ис нӕ политикон архайды культурӕйы",- загъта уый.
Форумы организатор у Фӕсивӕды хъуыддӕгты фӕдыл федералон агентад, мидӕггагон политикӕйы фӕдыл УФ президенты управленийы хъусдардӕй.
