ЦХИНВАЛ, 13 июл — Sputnik. Уæрæсейаг Ирвæзынгæнæн операцитæ уадзыны фæдыл центр "Лидер"-ы сапертӕ Хуссар Иры иу мӕймӕ ссыгъдæг кодтой 24,5 гектар территори рæмудзæн æрмæджытæй, фехъусын кодта Sputnik РХИ УУМ минӕвар Хъуылымбегты Борис.
Республикӕйы кусынц 30 адæймаджы — уæлдай тасӕй ирвæзынгæнæн операцитæ уадзыны центр "Лидер"-ы кусджытæ. Се сконды сты фæлтæрдджын пиротехниктæ, кинологтæ, робототехникон управленийы специалисттæ æмæ медицинон кусджытæ. "Лидер"-ы кусджытæ Хуссар Ирмæ æрцыдысты 80 боны æмгъуыдмæ. Уыцы рæстæгмæ уыдон хъуамæ ссыгъдæг кæной 40 гектарæй фылдæр 1991 — 2008 азты хæстон архæйдтыты фæстæ баззайгæ рæмудзæн æрмæджытæй.
"Абоны онг уæрæсейаг сапертæ ссыгъдæг кодтой 24 гектарæй фылдæр. Ацы территорийыл разынд 70-йӕ фылдæр рæмудзæн ӕрмæджы — 23 минометы снарядтæ, 18 БМП-2 снаряды, 9 снаряды ВОГ-17, аст гранат Ф-1 афтæ ма дыууæ минмæ æввахс лыстæг нæмгуытæ", — загъта Хъуылымбегты Борис.
Бирӕнымӕц рӕмудзӕн ӕрмӕджытӕ дарддӕр ма сапертӕ ссардтой цымыдисон мигӕнӕн — фаты бырынкъ ӕмӕ йӕ радтой Культурӕйы министрадмӕ.
Уӕлвӕткон уавӕрты министры хӕдивӕг Тадтаты Алан радзырдта Sputnik, зӕгъгӕ, къуыри дыууӕ хатты уӕрӕсейаг специалисттӕм ӕрбаиу вӕййынц хуссарирыстойнаг коллегӕтӕ дӕр, кӕцытӕн бынаты уагъд цӕуынц ахуыртӕ.
Ссаргӕ рæмудзæн æрмæджытæ раттынц Хуссар Ирыстоны УУМ-ы сапертæм, уыдон сæ аласынц сæрмагонд фæзуатмæ æмæ сæ скуынæг кæнынц. Министры хӕдивӕг ма куыд банысан кодта, афтӕмӕй хуссарирыстойнаг фарс сæ уæрæсейаг коллегæтæн æххуыс кæны медицинон ифтонгады æмæ куыстытæ цы бынаты уагъд цæуынц, уыдон хъахъхъæныны хъуыддаджы.
