ЦХИНВАЛ, 13 июл — Sputnik. Цæгат Ирыстонæй Паддзахадон Думæмæ депутаттæм кандидаттæ хайад райсдзысты проект "Amdzavga"-йы, фехъусын кодта Sputnik проекты къухдариуæггæнæг Гæззаты Дауыт.
"Депутаттæ хайад райсдзысты проекты, кæцы здæхт у ирон æвзаг æмæ литературæ рапарахат кæнынмæ. Хайадисджытæ бакæсдзысты, сæ зæрдæмæ цы автор фæцæуа, уый æмдзæвгæтæ уырыссаг æмæ ирон æвзæгтыл. Нæ сайтыл ис 100 авторы æмдзæвгтæ, се 'хсӕн куыд фӕлтӕрд, афтӕ ӕвзонг фысджытӕ дӕр", — банысан кодта уый.
Йӕ ныхæстæм гæсгæ, проекты хайад райсыны тыххӕй разыдзинад равдыстой УФ Паддзахдон Думæмæ цæгатирыстойнаг авд кандидатæй æртæ — архайгӕ депутат Мæхъиты Зураб, юрист Ӕгъуызарты Мурӕт ӕмӕ хъӕбысӕйхӕцӕг Таймӕзты Артур.
"Раздӕр видео ӕмдзӕвгӕтӕ кастысты Цӕгат Ирыстоны аивӕдты сгуыхт архайджытӕ, 1-3 кълӕсты скъоладзаутӕ, ирон ӕвзаджы ахуыргӕнджытӕ. Ныр та рады сты депутаттӕ. Ныфс мӕ ис, Таймӕзты Артур мадӕлон ӕвзагыл ӕмдзӕвгӕ куыд кӕсы, уый фенгӕйӕ спорсментӕ дӕр ӕрбаиу уыдзысты ӕмӕ райдайдзысты ирон ӕвзаг ӕмӕ литературӕ ахуыр кӕнын", — загъта Гӕззайы фырт.
Уый ныфс ис, массон информацийы минӕвӕртты хорз куысты фӕрцы тагъд рӕстӕджы проектимӕ кӕй базонгӕ уыдзӕн фылдӕр адӕм ӕмӕфӕфылдӕр уыдзӕн йӕ хайадисджыты нымӕц дӕр.
Проект "Amdzavga", кӕцы у нывонд ирон поэзийӕн, преми "Прометей-2014"-ы нымад ӕрцыд Цӕгат Кавказы хуыздӕр культурон-рухсадон проектыл.
