ЦХИНВАЛ, 15 июл — Sputnik. Цхинвайлаг музыкалон ахуыргӕнӕндоны хъомылгӕнинӕгтӕ ахуыр цӕудзысты Россинийы консерваторийы, фехъусын кодта Хуссар Ирыстоны официалон минӕвар Италийы Мауро Мурджа майрӕмбоны, пресс-конференцийы рӕстӕджы.
Хуссар Ирыстоны минӕвар Италийы Мауро Мурджа ӕмӕ кинокритик Федерико Чичеронийы хайадистӕй пресс-конференци уагъд ӕрцыд майрӕмбоны Sputnik Хуссар Ирыстоны мультимедион пресс-центры фӕзуатыл. Уыдон республикӕмӕ фӕуазӕг сты Цхинвалы Италиаг кинойы бонты фӕлгӕтты.
Мурджа ӕрӕмбырдуӕвджыты зӕрдӕтыл ӕрлӕууын кодта, бадзырдты фӕлгӕтты алы дыууӕ мӕй дӕр цхинвайлаг музыкалон ахуыргӕнӕндоны фӕйнӕ дыууӕ ахуыргӕнинаджы кӕй цӕудзысты ахуыр Россинийы академийы.
"Мах сфӕнд кодтам иу адӕймагӕн ахуыры аз ӕнӕхъӕнӕй раттыны бӕсты уый цалдӕр адӕймагыл адих кӕнын, цӕмӕй куыд фылдӕр курдиатджын адӕм исой фӕлтӕрддзинад алыгъуызон мастер-классты", — банысан кодта Мурджа.
Уый ма бафтыдта, йӕ куыст фыццаджыдӕр здӕхт кӕй у Итали ӕмӕ Хуссар Ирыстоны ӕхсӕн культурон бастдзинӕдты райрӕзтмӕ.
Ацы азы кӕрон РХИ минӕварад Италийы фӕнд кӕны хуссарирыстойнаг нывгӕнджыты равдыст италиаг горӕттӕй иуы сорганизаци кӕнын.
Мурджайы ныхӕстӕм гӕсгӕ, минӕварады нывӕзтыты ис бадзырд бафыссын, кӕцымӕ гӕсгӕ Цхинвал ӕмӕ Палермойы университетты ӕхсӕн уыдзӕн студентты ивд.
"Уыдӕттӕ нырма нывӕзтытӕ сты. Фӕлӕ нӕ ныфс ис, алцыдӕр нын кӕй бантысдзӕн, ӕмӕ студенттӕ, куыд Цхинвалӕй, афтӕ Палермойӕ дӕр кӕй дих кӕндзысты сӕ фӕлтӕрддзинад ӕмӕ кӕй зонгӕ кӕндзысты кӕрӕдзи историимӕ", — загъта Мурджа.
Мурджайы уӕлдай, кӕцы Хуссар Ирмӕ ӕрцӕуы фӕстаг ӕртӕ азы, кинокритик Федерико Чичерони Цхинвалмӕ ӕрцыд фыццаг хатт. Журналистты фарстӕн, зӕгъгӕ, нӕ фӕнд кӕны кино Хуссар Ирыстоныл сисын, кинокритик дзуапп дӕтты — "гӕнӕн алцӕмӕн дӕр ис".
"Мӕ фӕнды уыд ӕмӕ ардӕм куы ӕрцыдтӕн, атмосферӕимӕ, адӕмимӕ куы базонгӕ дӕн, уӕд мӕ хъуыдымӕ гӕсгӕ, бафӕлвардзыстӕм Хуссар Ирыстоны тыххӕй радзурын, цӕмӕй италийӕгтӕ ӕввахсдӕр базонгӕ уой уӕ бӕстӕимӕ", — бафтыдта Чичерони.
Пресс-конференцийы кӕронбӕттӕны Мурджа банысан кодта Хуссар Ирыстоны минӕварады байгомы нысаниуӕг Римы центры ӕмӕ равдыста ныфс ӕнтыстджын ӕмгуыстады фӕдыл.
"Нӕ стратеги ис уый мидӕг, цӕмӕй кусӕм нӕ бӕстӕты ӕхсӕн культурон ахастыты райрӕзтыл. Мах уарзӕм уӕ бӕстӕ. Ацы ӕмгъуыдмӕ бантыст бирӕ саразын ӕмӕ арӕзт цӕуы стыр куыст, кӕцыйы сӕйраг нысан у италийӕгтӕн фылдӕр зонӕнтӕ раттын Хуссар Ирыстоы тыххӕй. Бакӕнгӕ куысты тыххӕй нын ис хорх фӕстиуджытӕ", — балхынцъ кодта Мурджа.
Хуссар Ирыстоны минӕварад Италийы официалон ӕгъдауӕй байгом ацы аз апрелы.
