ЦХИНВАЛ, 19 июл — Sputnik. Арӕзтадон объекттыл куыстытӕ уагъд хъуамӕ цӕуой коллективы хъусдарды бын, кӕцытӕ эксплуатаци кӕндзысты ног бӕстыхӕйттӕ, загъта Sputnik Цӕгат Кавказы хъуыддӕгты фӕдыл министр Лев Кузнецов.
Уӕрӕсейаг министр ис Хуссар Ирыстоны дыууӕбӕнон кусӕгон визитимӕ. Къуырисӕры уый бабӕрӕг кодта Цхинвалы арӕзтадон объекттӕ.
Кузнецов банысан кодта, арӕхстджын арӕзтад развӕлгъау проектон-хыгъдон документаци сарӕзтимӕ, арӕзтадон куыстыты гъӕды фӕдыл Стройтехнодзоры контроль ӕмӕ бӕстыхӕйтты цы коллектив кусдзӕн, уыдоны хайадист кӕй фӕахъаз уыдзӕн куыстытӕ тагъддӕр ӕмӕ гъӕдджынӕйдӕр сӕххӕст кӕнынӕн.
"Арӕзтады рӕстӕджы алыхатт дӕр вӕййы цӕлхдуртӕ, фӕлӕ сӕйрагдӕр у, цӕмӕй уый ӕмӕ нардуатисӕг ӕрбацӕуа ӕмӕ сӕ рӕстӕгыл аиуварс кӕна. Сывӕллӕтты рынчындоны мах федтам, архитектурон ӕмӕ техникон ӕгъдауӕй алцыдӕр кӕй у цӕттӕ", — загъта министр.
Уый ма банысан кодта, ацы объектыл ныридӕгӕн кӕй хъӕуы снысан кӕнын сӕйраг дохтыр ӕмӕ сӕйраг инженеры.
"Уымӕн ӕмӕ уыдон сты сӕйрагдӕр адӕм, уыдон зонынц, куыд хъуамӕ уа, цӕмӕ хъӕуы аздахын сӕйраг хъусдард. Ӕхсызгон мын у, театры уал ахӕм практикӕ кӕй бакодтой", — загъта уӕрӕсейаг министр.
Йӕ хъуыдымӕ гӕсгӕ, арӕзтадон объекттыл куыстытӕ уагъд хъуамӕ цӕуой коллективы хъусдарды бын, кӕцытӕ эксплуатаци кӕндзысты ног бӕстыхӕйттӕ.
"Сӕ ныхас арӕзтады министрадӕн дӕр ӕмӕ хицауадӕн дӕр хъуамӕ уа сӕйраг аргумент. Сӕ ныхас, мӕ хъуыдымӕ гӕсгӕ, у принципиалон", — бафтыдта уый.
Уый банхъардта практикӕ, цӕмӕй алы аразгӕ объектыл дӕр баконд ӕрцӕуа фӕйнӕг информацион зонӕнтимӕ.
"Ӕмӕ уӕд йӕ фӕрсты чи цӕуы, уыдон иууылдӕр ӕмбарой, ацы объект чи сарӕзта, уый кӕй у кады аккаг, кӕнӕ уайдзӕфты аккаг. Мидӕггагон бӕрны ӕнкъарӕн хъуамӕ уа аразгӕ куысты тыххӕй", — загъта Кузнецов.
Министр банысан кодта, арӕзтады гъӕд кӕй уыдзӕн гӕнӕн бахъахъхъӕнын нардуатисӕджы гарантиты фӕрцы, кӕцыты ӕмгъуыд уыдзӕн, объект эксплуатацимӕ лӕвӕрд куы ӕрцӕуа, уымӕй дыууӕ аз.
