ЦХИНВАЛ, 28 июл — Sputnik. Цӕгат Ирыстоны Фӕндагон змӕлды ӕдасдзинады паддзахадон инспекцийы управленийы кусджытӕй дыууӕмӕ азым хӕссынц сӕ барты сӕрты ахизыны ӕмӕ шофыры бартӕ уӕй кӕныны хъуыддагмӕ, фехъусын кодтой Sputnik МХМ-ы пресс-службӕйы.
Операци уагъд ӕрцыд республикӕйы барадхъахъхъӕнӕн органты рӕнхъыты коррупцийы ныхмӕ мадзӕлтты фӕлгӕтты.
"Оперативон-агурӕн мадзӕлтты рӕстӕджы оперативон кусджытӕ раргом кодтой ӕнӕхъӕн фыдгӕнон схемӕ, кӕцы куыста куыд иттӕг хорз рӕвдз механизм. Слестгӕнджытӕ нырма хъуамӕ сбӕлвырд кӕной, ацы криминалон къорды сконды ма чи уыд ӕмӕ алкӕмӕн дӕр раттын барадон аргъ", — загътой пресс-службӕйы.
Ныртӕккӕ паддзахадон автоинспекцийы кусджытӕ дыууӕ дӕр сты ахст ӕмӕ сӕ ныхмӕ баконд ӕрцыд уголовон хъуыддӕгтӕ "Гӕртам райсыны" статьяйы фӕдыл.
"Кӕд пъӕлицӕйы кусджыты аххос тӕрхондон сбӕлвырд кӕна, уӕд уыдон ист ӕрцӕуыдзысты сӕ бынӕттӕй барадхъахъхъӕнӕг органтӕй ӕппӕрццаг мотивтӕм гӕсгӕ, сӕ къухдариуӕггӕнджытӕ та баййафдзысты карз дисциплинарон ӕфхӕрд", — загътой уагдоны.
Цӕгат Ирыстоны МХМ-ы пресс-службӕйы ныфс дӕттынц, мидхъуыддӕгты министрады рӕнхъыты коррупци скуынӕг кӕныны фӕдыл куыст кӕй адарддӕр уыдзӕн ӕмӕ ацы уголовон хъуыддӕгтӕ кӕй не сты фӕстаг.
