ЦХИНВАЛ, 29 июл — Sputnik, Босыкты Наталья. Цӕрӕнуатон-арӕзтадон кооператив №29 уӕнгтӕ бахатыдысты Хуссар Ирыстоны хицауадмӕ бирӕфатерон хӕдзары арӕзтад сӕндидзын кӕныны куырдиатимӕ.
Цы хӕдзарыл цӕуы дзырд, уый Джиоты Аланы проспектыл райдыдтой аразын 1987 азы, фӕлӕ 1991 азы гуырдзиаг агрессийы аххосагӕй арӕзтад ныллӕууыд. Кусджытӕн бантыст фондз уӕладзыгӕй ӕрмӕстдӕр цыппар саразын.
Бирӕфатерон хӕдзары арӕзтадӕн кооперативы уӕнгтӕ бафыстой фатерты аргъы 50% бӕрц (уӕды рӕстӕджы 8-10 мин сомы). Кооперативы уӕнгтӕ ссисты ӕмбӕстӕгтӕ, кӕцытӕ лӕууыдысты хӕдзар райсынмӕ рады, афтӕ ма ӕмбӕстӕгтӕ, кӕцыты цӕрӕнуатон уавӕртӕ домдтой фӕхуыздӕр кӕнын.
Кооперативы уӕнгтӕ 30 азы дӕргъы цыдысты алыгъуызон инстанцтӕм. Ацы хӕдзары фатертӕ райсынмӕ цы 58 бинонтӕ ӕнхъӕлмӕ кастысты, уыдонӕй ма баззад 27 бинонтӕ.
"Мах цыдыстӕм алыгъуызон инстанцтӕм, дзырд нын дӕттой, кӕй бахӕсдзысты хӕдзары арӕзтад 2014-2016 азты инвестицион программӕмӕ, фӕлӕ уый арӕзт не ′рцыд. Ивгъуыд цыппӕрӕм нӕ йӕхимӕ райсын сразы хицауады сӕрдар.Уый банхъардта, цӕмӕй кооперативы уӕнгты бахӕссой хӕдзар райсыны фӕдыл фыццарадон номхыгъдтӕм", — дзуры кооперативы уӕнгтӕй иу.
Йӕ хъуыдымӕ гӕсгӕ, ацы ӕнхъарӕн фарст ӕппары райдайӕн позицитӕм.
"Бӕрӕг нӕу, цас рӕстӕг та нӕ бахъӕудзӕн ӕнхъӕлмӕ кӕсын ацы хатт дӕр", — дзуры сылгоймаг.
Президент ӕмӕ хицауады пресс-службӕ Sputnik фехъусын кодтой, "хицауады сӕрдар кӕй банхъардта ӕнӕмӕнгхъӕуӕг документтӕ ӕрӕмбырд кӕнын ӕмӕ хӕдзар райсыны рады иумӕйаг хыгъды слӕууын".
