ЦХИНВАЛ, 4 авг — Sputnik. Æхсæнадæмон проект "Алайнаг фæд"-ы архайджытæ фӕуазӕг уыдзысты Хуссар Ирыстонмӕ, фехъусын кодтой Sputnik культурӕйы министрады пресс-службӕйы.
Аланты фӕдонтӕ дунейы алы къуымтӕй ӕрӕмбырд кодта Цӕгат Ирыстоны этнолагерь "Алайнаг фæд". Лагерь архайдзӕн 1-8 августмӕ, йӕ хайадисджытӕ 5-6 августы фӕуазӕг уыдзысты Хуссар Ирыстонмӕ.
"Не ‘мирон адӕм Хуссар Ирмӕ ӕрцӕудзысты майрӕмбоны. Сири, Турк, Венгри, Словаки ӕмӕ Хорватийы ирон диаспорӕты уӕнгтӕн уыдзӕн фембӕлд республикӕйы къухдариуӕгад ӕмӕ интеллигенцийы минӕвӕрттимӕ, бабӕрӕг кӕндзысты гуырдзиаг агрессийы бабынуӕвӕг адӕмы мемориалон цырт ӕмӕ Национ музей", — загъта уагдоны пресс-секретарь Остъаты Мадина.
Уый ма банысан кодта, делегаци хуынд кӕй цӕуы ПККЗ "Чермен"-ы концертмӕ ӕмӕ Хуссар Ирыстоны нывгӕнджыты равдыстмӕ.
Ӕрӕджы ӕхсæнадæмон проект "Алайнаг фæд"-ы архайджытæ фембæлдысты Цæгат Ирыстоны сæргълæууæджы хæстæ рæстæгмæ æххæстгæнæг Битарты Вячеславимæ дӕр.
