ЦХИНВАЛ, 4 авг — Sputnik. Цхинвалы ӕмрӕстӕджы байгом уыдзӕн дыууӕ равдысты, фехъусын кодта Sputnik Хуссар Иры Нывгӕнджыты цӕдисы сӕрдар Цхуырбаты Тамерлан.
ПККЗ "Чермен"-ы фойейы фенӕн уыдзӕн Нывгӕнджыты цӕдисы уӕнгты куыстытӕ. Мадзал сӕрмагондӕй цӕттӕ цӕуы ирон диаспорӕты уӕнгты ӕрцыдмӕ.
"Сӕрмагондӕй бацӕттӕ кодтам равдыст ирон диаспорӕты минӕвӕртты ӕрцыдмӕ. Мадзалы фенӕн уыдзӕн 15 нывгӕнӕджы куыстытӕн, кӕцытӕ фылдӕр бӕрцӕй сты баст националон ӕмӕ этнографион тематикӕимӕ", — банысан кодта цӕдисы сӕрдар.
Уый ма радзырдта, цыппӕрӕмы ма кӕй бакодтой Анахарсисы номыл республикон библиотекӕйы Тугъанты Махарбеджы номыл нывгӕнӕн ахуыргӕнӕндоны рауагъдонты дипломон куыстыты равдыст.
ПККЗ "Чермен"-ы нывгӕнджыты цӕдисы уӕнгты куыстыты равдыст организацигонд ӕрцыд Цӕдис ӕмӕ Культурӕйы министрады хъӕппӕрисӕй. Нывгӕнӕн ахуыргӕнӕндоны рауагъдонты равдыст та аразы ахуыргӕнӕндоны къухдариуӕгад.
