Мадзӕлттӕ райдыдтой уӕрӕсейаг фидауынгӕнджыты цыртмӕ дидинты сӕвӕрдӕй, кӕцытӕ сӕхимӕ райстой агрессоры фыццаг цӕф. Ам иу уысм алӕууыдысты ӕдзӕмӕй.
Республикӕйы къухдариуӕгад, цӕрджытӕ ӕмӕ уазджытӕ сӕвӕрдтой дидинтӕ Хуссар Ирыстоны фӕмардуӕвӕг хъахъхъӕнджыты ӕмӕ сабыр цӕрджыты монументтӕм, кӕцытӕ баисты агрессийы амӕттаг.
Фӕмардуӕвджыты рухс ном ссарынмӕ ӕрбацыдысты президент, хицауады уӕнгтӕ, парламенты депутаттӕ, республикӕйы цӕрджытӕ ӕмӕ уазджытӕ.
Мадзӕлттӕ адарддӕр сты "Басыгъдгонд удты музей"-ы Зары фӕндагыл. Акцийы хайадисджытӕ сӕвӕрдтой дидинтӕ, 2008 азы ацы фӕндагыл судзгӕ Цхинвалӕй чи фӕлвӕрдта алидзын ӕмӕ кӕмӕн нӕ бантыст, уыцы сабыр цӕрджыты монументмӕ. Алайнаг епархийы динамонӕг ауагъта скуывд фӕмардуӕвджыты номарынӕн.Изӕрӕй, Хуссар Ирыстоны парламенты бӕстыхайы раз Гергиаг асиныл уагъд ӕрцыд фыдохы акци "Нӕ ферох кӕндзыстӕм, цалынмӕ удӕгас стӕм…" Ахӕм ном асинӕн лӕвӕрд ӕрцыд 2008 азы августы — уӕд ам уагъд ӕрцыд Гергиты Валерийы къухдариуӕгадӕй Мариинаг театры концерт-реквием.
Фӕмардуӕвджыты рухс ном ссардтой иу уысм ӕдзӕмӕй алӕугӕйӕ.
Фыдохы мадзӕлттӕм нӕ республикӕмӕ ӕрцыдысты августы бонты фӕмардуӕвӕг уӕрӕсейаг солдатты мӕдтӕ. Сӕ номӕй митинджы раныхас кодта Цӕгат Иры Солдатты мӕдты комитеты сӕргълӕууӕг Гогаты Лора.
Ӕхсӕзаздзыд Георгий схызт асинмӕ ӕмӕ бахатыд ӕрӕмбырдуӕвджытӕм, цӕмӕй скувой "Хуыцаумӕ, цӕмӕй хӕст макуыуал уа".
Йӕ къухты уыд сириаг чызджы къам — уый бахатыд ӕрӕмбырдуӕвджытӕм, цӕмӕй йыл къухфысттӕ саразой ӕмӕ йын ӕй уый фӕстӕ арвита, "цӕмӕй уый макуы мацӕмӕй тӕрса".
