ЦХИНВАЛ, 8 авг — Sputnik, Босыкты Наталья. 2008 азы августы гуырдзиаг ӕфсады фыдракӕндты ӕвдисӕндартӕ ӕвдыст ӕрцыдысты къуырисӕры, Цхинвалы аст азы размӕ трагикъон цаутӕн нывонд равдысты.
Хуссар Ирыстоны уагъд цӕуынц фыдохы мадзӕлттӕ, кӕцытӕ нывонд сты 2008 азы гуырдзиаг агрессийыл аст азы сӕххӕстӕн.
Хуссар Ирыстоны Националон музейы ӕрбайгом экспозици, ам ӕвдыст сты ракетӕты ӕмӕ сармадзанты схъистӕ, кӕцытӕй гуырдзиаг артиллери ӕмӕ танктӕ ӕхсты бын фӕкодтой хуссарирыстойнаг цӕрӕн пункттӕ, афтӕ ма уыцы бонты фото ӕмӕ видеокадртӕ.
Мадзалмӕ ӕрбацыдысты хицауады уӕнгтӕ, ӕхсӕнадон архайджытӕ ӕмӕ республикӕйы цӕрджытӕ.
Музейы директор Зассеты Мерабы ныхӕстӕм гӕсгӕ, равдысты экспонаттӕ сты ирон адӕмы геноциды ноджы иу цӕстуынгӕ ӕвдисӕнад.
"Ацы хӕстӕрмӕджытӕ ӕмӕ къамтӕ ӕвдисӕн сты, фашизм кӕй нӕ фесӕфт. Хъыгагӕн, дунейӕн нӕма бантыст ууыл фӕтых уӕвын. Экспозицийӕн ацы хуыз ӕлхынцъон нӕу, куыст дарддӕр цӕуы, цӕмӕй рӕзгӕ фӕлтӕр зона, цы нын бантыст бавзарын", — загъта Зассеты Мераб.
Уый ма быфтыдта, информаци ӕмбырд кӕныны рӕстӕджы стыр ӕххуыс кӕй бакодтой РХИ мидхъуыддӕгты министрад ӕмӕ Генералон прокуратурӕ.
