ЦХИНВАЛ, 10 авг — Sputnik. Фыццаг ирон сылгоймаг-дирижер Дудараты Вероникæйы райгуырдыл 100 азы сӕххӕсты бон Цӕгат Ирыстоны банысан кӕндзысты цытджын мадзӕлттӕй, хъусын кӕны ГТРК "Алания".
Зынгӕ дирижеры юбилейы цытӕн мадзӕлттыл ӕрдзырдтой республикӕйы хицауады рабадты рӕстӕджы. Культурæйы министры хæстæ рæстæгмæ æххæстгæнæг Атайты Мæдинæ хицауады уӕнгты базонгæ кодта Мæскуыйы Дудараты Вероникæйы номыл концертмæ цæттæгæнæн мадзæлттыл, монографи рауадзыны æмæ къамты равдыст саразыныл.
"Юбилейон мадзæлттæ схуыдтой "Огненное болеро Вероники Дударовой". Дзæуджыхъæуы байгом уыдзæн Дудараты Вероникæйы тыххæй къамты равдыст. Афтӕ ма культурæйы министрады хъæппæрисæй арæзт æрцæудзæн симфонион музыкæйы фестиваль "Хæхты симфонитæ". Йæ архайджытæн ма арæзт æрцæудзæн тымбыл фынг дӕр, ныхас дзы цæудзæн зындгонд дирижеримæ иумæйаг куысты тыххæй мысинæгтыл", — банысан кодта министр.
Атайты Мæдинæйы ныхæстæм гæсгæ, 5-æм декабры та Мæскуыйы дирижеры ингæныл Троекуровы уæлмæрды сæвæрдзысты дидинджытæ.
"Сæйраг мадзал уыдзæн Мæскуыйы паддзахадон консерваторийы. Концерты архайдзæн Мариинаг театры аивадон разамонæг Гергиты Валерий", — балхынцъ кодта уый.
Дудараты Борисы чызг Вероникæ — Советон Цæдисы адæмон артисткæ, Уæрæсейы адæмон артисткæ, Удмуртийы адæмон артисткæ, Цæгат Ирыстон — Аланийы адæмон артисткæ. Райгуырдис 1916 азы 5 декабры Бакуйы. 1933-1937 ӕзты ахуыр кодта фортепианойыл цæгъдын Ленинграды консерваторийы цур музыкалон ахуыргӕнӕндоны. 1947 азы та каст фæцис Мæскуыйы консерваторийы режиссёрон факультет.
Хицӕн ӕзты куыста Мæскуыйы академион симфонион оркестры дирижёрӕй, сæйраг дирижёрӕй æмæ аивадон разамонæгӕй. 1991-2009 ӕзты та разамынд лæвæрдта Уæрæсейы симфонион оркестрæн. У бирӕнымӕц хæрзиуджытæ æмæ кадджын нæмтты хицау. Зынгӕ ирон режиссер амард 2009 азы 15 январы Мæскуыйы.
