ЦХИНВАЛ, 11 авг — Sputnik. Цӕгатирыстойнаг рапиристкӕ Санаты Аидӕ бацахста цыппӕрӕм бынат фехтованийы турниры Олимпиаг хъӕзтыты Рио-де-Жанейройы, хъусын кӕны агентад "Р-Спорт".
Ӕрдӕгфиналы уый фӕхӕрд суинаг олимпиаг чемпионкӕ Инна Дериглазовайӕн 3:15 хыгъдӕй, бронзӕ майданыл тохы та — тунисаг спортсменка Инес Бубакрийӕн.
Санаты Аида куыд банысан кодта, афтӕмӕй ӕртыккаг бынат бацахсыны сӕраппонд ныхмӕлӕуды уый уыд уӕззау психикон уавӕры.
"Цард дарддӕр кӕны, кӕй зӕгъын ӕй хъӕуы, фӕлӕ Олимпиадӕмӕ ӕрцӕуджытӕй алкӕй дӕр фӕнды майдан рамбулын. Дыууӕ хатты мын зындӕр у, цыппӕрӕм бынат мӕм кӕй ӕрхаудта — мӕ бон ӕртыккаг бынат уӕддӕр уыд бацахсын. Куыд гӕнӕн уыд ӕрдӕгфиналы 3:15 хыгъдӕй фембылды уӕван. Ахӕм цыдӕр мыл никуыма рцыд ӕмӕ мын зын у уыцы фӕхӕрд быхсын. Хорз райдыдтон, фӕлӕ мын куыд фӕстагмӕ зынӕй-зындӕр кодта", — загъта журналисттӕн Санаты чызг.
Йӕ ныхӕстӕм гӕсгӕ, иу ныхмӕлӕуд дӕр ӕнцонтӕй нӕ бафтыд йӕ къухты — уӕлдай зындӕр спортсменкӕйӕн уыд ӕрдӕгфиналы тох.
"Ӕз бавзӕрстон шок, фембылд дӕн трагикон ӕгъдауӕй. Фыдӕнхъӕл фӕдӕн", — бафтыдта рапиристкӕ.
Инна Дериглазова, кӕцыйӕн ирон спортсменкӕ фембылд ӕрдӕгфиналы, ссис фехтованийӕ олимпиаг турниры уӕлахиздзау ӕмӕ ӕрхаста уӕрӕсейаг ӕмбырдгондӕн хъӕзтыты цыппӕрӕм сыгъзӕрин майдан. Финалон ныхмӕлӕуды уӕрӕсейаг 12:11 хыгъдӕй фӕуӕлахиз Элизу Ди Франчискуйыл Италийӕ.
Тынг зын у хиуӕтты ныхмӕ лӕууын, кӕд нын ахӕм хыгъд ис, уӕддӕр. Психологон ӕгъдауӕй тынг зын у — кӕрӕдзи хорз зонӕм. Аидӕйы къухты ӕнтыст куыд бафтыдаид, афтӕ мӕ къухты дӕр", — ахӕм комментарий сарӕзта Дериглазова Санаты Аидӕимӕ ныхмӕлӕуды тыххӕй.
