ЦХИНВАЛ, 15 авг — Sputnik. Цхинвалы Кады аллейы уагъд ӕрцыд хуссарирыстойнаг курсантты Ӕфсӕддон ардбахӕрды цытджын церемони, кӕцытӕ ахуырмӕ бацыдысты Уӕрӕсейы хъахъхъӕнынады министрады уӕлдӕр ахуырадон уагдӕттӕм. Ардбахӕрд райстой 32 курсанты, уыдонӕй 11 чызджы, фехъусын кодта хъахъхъӕнынады министрады пресс-службӕ.
Цытджын уавӕры хъахъхъӕнынады министрады суинаг офицертӕ дзырдтой Ӕфсӕддон ардбахӕрды ахсджиаг ныхӕстӕ ӕмӕ Кады аллейы айзӕлыд Хуссар Ирыстоны паддзахадон гимн.
Сӕйраг командагӕнӕг, Хуссар Ирыстоны президент Тыбылты Леониды номӕй курсанттӕм ӕрсидт паддзахадон уынаффӕгӕнӕг Олег Сулимов.
"Сымах хъуамӕ суат ӕмбӕлон дӕнцӕг уе ′мгӕрттӕн ӕмӕ цавӕрдӕр рӕстӕджы фӕстӕ уӕхи банкъарад ӕцӕг офицертӕ. Ӕфсӕддон ардбахӕрды ныхӕстӕ зӕгъгӕйӕ, сымах, курсанттӕ, ссистут Фыдыбӕстӕ хъахъхъӕнджытӕ", — банысан кодта уый.
Суинаг офицерты номӕй та раныхас кодта курсант Тыджыты Ионафан, кӕцы загъта бузныг республикӕйы къухдариуӕгадӕн ахӕм фадаты тыххӕй.
"Мах абон дӕттӕм дзырд нӕ Фыдыбӕстӕйӕн, кӕдфӕнды дӕр кӕй уыдзыстӕм цӕттӕ йӕ бахъахъхъӕнын. Мах дӕттӕм дзырд, кӕй хъахъхъӕндзыстӕм Республикӕ Хуссар Ирыстоны ӕмбӕстаджы кад ӕмӕ намыс", — загъта курсант.
Мадзалы кӕронбӕттӕны кады хъарагъул, курсанттӕ ӕмӕ хъахъхъӕнынады министрады дӕлхӕйттӕй цалдӕр рацыдысты цытджын маршӕй Кады аллейы.
Зӕрдыл лӕууын кӕнӕм, дыууӕ къуырийы дӕргъы курсанттӕ кӕй рацыдысты "ӕвзонг хӕстоны курс" РХИ Хъахъхъӕнынады министрады ахуырадон центр "Барс" —ы.
