ЦХИНВАЛ, 25 авг — Sputnik, Плиты Фатимӕ. Республикӕйы хицауад сфидар кодта фонтаны проект, кӕцы арӕзт ӕрцӕудзӕн Цхинвалы Театралон фæзуаты азы кӕронмӕ. Уый уыдзӕн Цӕгат Кавказы иууыл стырдӕр сур музыкалон фонтан алайнаг орнамент ӕмӕ симды зӕлтимӕ, фехъусын кодта Sputnik паддзахадон драмон театры аивадон къухдариуæггæнæг Дзуццаты Тамерлан.
Цхинвалы сæйраг фæзуаты цы арæзт хъуамæ æрцæуа, уый фæдыл æхсæнады уыд ныхмæвæрд хъуыдытæ. Иутæ уыдысты зæронд фонтаны айсыны ныхмæ, аннæтæ домдтой æнгæс фонтан националон элементтимæ саразын. Уыд ахæмтæ дӕр, кæцыты фæндыд Театралон фæзуат бынтондӕр расæрибар кæнын арæзтæдтæй.
"Дæргъвæтин хъаугъаты фæстæ рахастæуыд уынаффæ, цæмæй Театралон фæзуаты арæзт æрцæуа афтæ хуыйнæг "сур фонтан". Проект бацæттæ кодта цæгатирыстойнаг фирмӕ "Промикс". Ацы фонтан аннæтæй хицæн кæны уымæй, æмæ зымӕгон рӕстӕг йæ рахицæны рæстæджы фæзуат уыдзæн сæрибар скульптурон композицитæй ӕмӕ алыгъуызон бæрæгбӕтты рæстæджы фæзуаты уыдзæн сæрибар бынат", — загъта Дзуццаты Тамерлан.
Уый банысан кодта, проекты ма хынцыд кӕй æрцыд, Театралон фæзуаты националон элементтæ фенын кæй фæндыд, уыдон фæндиæгтæ — сур фонтаны астæу уыдзæн алайнаг æнусон змæлды нысан.
"Фонтан ма уыдзæн музыкалон дӕр. Бирæнымæц мелодиты ‘хсӕн, кæцыты дæлбар кафдзысты фонтаны æхсæрдзæнтæ, уыдзæн симды аив зæлтæ дæр. Объекты диаметр уыдзæн 15 метры бæрц, уыййас бæрзæндæй кæлдзысты фонтаны дæттæ дæр. Уый уыдзæн иууыл стырдæр Цæгат Кавказы сур фонтатæй", — бафтыдта йæ ныхæстæм театры аивадон къухдариуæггæнæг.
Арæзтады министрады пресс-службæйы Sputnik ныфс бавӕрдтой, фонтан кæй сцæттæ уыдзæн театры бæстыхайимæ иумæ.
"Куыд театры, афтӕ фонтаны арæзтад дӕр хауы арæзтадон организаци "Эверест"-мæ, уымæ гæсгæ фонтан саразыны фæдыл бадзырд бафыссын дæр ис уый бæрны. Арæзтады министрадæн ныфс бавæрдтой, азы кæрон театры бæстыхай эксплуатацимæ лæвæрд куы цæуа, уыцы æмгъуыдмæ сур фонтан дæр кӕй ӕрцӕудзӕн арæзт", — загъта уагдоны пресс-секретарь Тедеты Алена.
Цхинвалы театралон фæзуат сæрибар никуы уыд — ам ивгъуыд рӕстӕджыты уыд цыртытæ советон фæтæгтæ Ленин æмæ Сталинæн, фæстæдæр ам арӕзт ӕрцыд фонтан. Фæлæ ивгъуыд ӕнусы 90-ӕм æзтӕй фæстæмæ уый стæм хатт рухс кода цӕрджыты зæрдæтæ йæ æхсæрдзæнтæй — фонтан-иу баиу кодтой ӕрмӕстдӕр паддзахадон бæрæгбӕтты рæстæджы, сабитæ-иу систой йæ разы къамтæ æмæ та иу изæрмæ фонтан басур. 2006 азæй фæстæмæ та хæлд фонтан сыгъд театры бæстыхайимӕ иумæ раууаты хуыз дæттой горæты центрæн. Фæстаг азты ма иу фонтан бабæззыд æрмæстдæр ногазон заз бæласы бындурæн.
