ЦХИНВАЛ, 1 сен — Sputnik, Плиты Фатимæ. Цхинвалы 9-16 сентябры уагъд цæудзæн уæрæсейаг кинойы къуыри, фехъусын кодтой Sputnik РХИ культурæйы министрады.
Мадзал уагъд цӕуы Хуссар Ир æмæ Уæрæсейы культурæты министрæдты æмархайды фæрцы, йӕ фæлгæтты ПККЗ "Чермен"-ы æвдыст цæудзысты, кинотеатралон прокаты 2015-2016 æзты цы фильмтӕ рацыдысты, уыдон.
"Программæмæ бацыдысты æндæр æмæ æндæр жанрты ис кинонывтæ, афтæ ма анимацион фильмтæ", — радзырдта уагдоны пресс-секретарь Остъаты Мӕдинӕ.
Уый ма бафиппайдта, мадзалы фæлгæтты ма скъоладзаутæн уæрæх экраныл кӕй равдисдзысты 100 хуыздæр сывӕллӕтты кинойы номхыгъдæй фондз.
"Сывæллæттæн фадат уыдзæн бакæсын советон кинотæ "Чучело", "Внимание, черепаха!", "Друг мой, Колька!.. ", "Добро пожаловать, или посторонним вход воспрещен" æмæ "Сто дней после детства". Алкæцы кинойы рæстæджы дæр æвдыст цæудзысты видеолекцитæ", — бафтыдта йæ ныхæстæм Мӕдинӕ.
Уæрæсейаг кинойы къуыри бакæндзӕн бирæнымæц уæрæсейаг æмæ æхсæнадæмон кинофестивальты лауреат, продюсер Игорь Угольников æмæ режиссер Дмитрий Месхиевы куыст "Батальонъ", кæцыйы æвдыст цæуынц фыццаг дунейон хæсты рæстæджы сылгоймæгты батальоны сырæзт.
Уæрæсейаг кинойы къуыри Цхинвалы уадзы кинокомпани "Гейт" РХИ æмæ УФ культурæйы министрæдты æмархайдæй.
