ЦХИНВАЛ, 7 сен — Sputnik. Спектакль "Сказ-Очники"-йы хӕрзаудӕн равдыст уагъд ӕрцӕудзӕн цӕгатирыстойнаг университеты киноконцертон залы майрӕмбоны, фарастӕм сентябры, фехъусын кодта Sputnik спектаклы автор Бессолты Каринӕ.
Мадзалӕй цы ӕфтиаг райсой, уый организатортӕ иууылдӕр ратдзысты Дзгойты Фатимӕйы бинонтӕн, кӕцы аирвӕзт Беслӕны трагедийы ӕмӕ йӕ хъӕуы цардӕн ахсджиаг клиникон ӕххуыс.
Бессолты Каринӕйы ныхӕстӕм гӕсгӕ, спектакль "Сказ-Очники"-йы, кӕцыйы премьерӕ уагъд ӕрцыд ацы августы, спайдагонд ӕрцыдысты чызджы мысинӕгтӕ, кӕцы, куыд Фатимӕ, афтӕ уыд Бӕслӕны скъолайы спортзалы амӕттӕгты ӕхсӕн ӕмӕ ӕвдисы сӕ рис ӕмӕ фыдæвзарæнтӕ.
"Спектакль у комкоммӕ баст йӕ историимӕ, Бӕслӕнимӕ. Чызджы финансон ӕххуыс кӕй хъӕуы, уый тыххӕй мах базыдтам социалон хызӕгтӕй. Цыбыр ӕмгъуыдмӕ скъуыддзаг ӕрцыд спектаклы хӕрзаудӕн равдыст ауадзын, цӕмӕй истӕмӕй баххуыс кӕной Фатимӕйӕн. Ацы хӕрзаудӕн равдысты организатор ӕмӕ цырынгæнæг ссис къамисӕг Гокъоты Алисӕ", — дзуры Бессолты Каринӕ.
Йӕ ныхӕстӕм гӕсгӕ, хӕрзаудӕн равдысты организаторты дисы бафтыдта ӕмбӕстӕгты ӕнгомдзинад, кӕцытӕ алыгъызон фӕрӕзты руаджы ӕххуыс кодтой Дзгойты Фатимӕйӕн фӕрӕзтӕ ӕрӕмбырд кӕнын.
"Тынг бирӕ дзуапхъæртӕ райстам социалон хызӕгтӕй пайдагӕнджытӕй, кӕцытӕ парахат кодтой ацы информаци сӕ сайттыл. Сӕйраджыдӕр ӕххуысы фӕдыл хатыдыстӕм нӕ зонгӕтӕм", — загъта спектаклы автор.
Дзгойты Фатимӕйыл цыд ӕрмӕстдӕр 10 азы, йӕ мад ӕмӕ хоимӕ куы ссисты Бӕслӕны фыццӕгӕм скъолайы теракты амӕттӕгтӕ. Ӕбуалгъ трагеди ахаста йӕ кӕстӕр хойы цард, Фатимӕйӕн бантыст аирвӕзын. Чызгӕн баххуыс кодтой немыцаг дохтыртӕ, кӕцытӕ йын скодтой вазыгджын операци. Уыцы фыдӕвзарӕнты фӕстиуджытӕ ныры онг дӕр уӕгъд нӕ уадзынц Фатимӕйы. Ныр 12 азы уый тох кӕны йӕ цардыл. Ӕрвылаз дӕр чызджы хъӕуы йӕ цардӕн ахсджиаг зынаргъ хосгӕнӕн курс рацӕуын Германийы. Дзгойты Фатимӕйы бинонтӕн нӕй фадӕттӕ, цӕмӕй бафидой 1милуан 800 мин сомы аргъ ӕнӕмӕнгхъӕуӕг процедурӕ.
Спектакльмӕ билеттӕ (300 сомы аргъ) балхӕнӕн ис цӕгатирыстойнаг университеты кассӕты.
Хӕрзаудӕн равдысты билеттӕ апарахат кӕныны фӕдыл организатортӕ бахатыдысты цалдӕр дзӕуджыхъӕуккаг организацитӕм. Спектаклы автор банысан кодта, командӕйы ныфс кӕй ис ӕрӕмбырд кӕнын йедзаг зал, цӕмӕй райсгӕ ӕфтиаг феххуыс уа чызгӕн йӕ цард бахъахъхъӕнынӕн.
