ЦХИНВАЛ, 22 сен — Sputnik. Ирон уæлибыхты фестиваль уагъд ӕрцӕудзӕн 25 сентябры Дзæуджыхъæуы, Горæты боны цытæн бæрӕгбонон мадзæлтты фæлгæтты, хъусын кæны цӕгатирыстойнаг столицӕйы администрацийы пресс-службæ.
Цæгат Ирыстоны сæйраг горæт йæ бæрæгбон банысан кæндзæн хуыцаубоны. Цытджын мадзæлтты рæстæджы сӕ хайадисджытӕн фадат уыдзæн ацаходын ирон къæбицы сæйраг хæринаг — уæлибыхтæй.
"Терчы донбыластæрд ацæудзæн ирон уæлибыхты фестиваль, ардӕм республикæйы арæхстджындæр æфсинтæ бавдисдзысты се ʻссывдтытæ. Конкурсы æнтыстджын суæвынæн æрмæст хæрзад уæлибых скæнын ацы хатт фаг нæу. Жюрийы уæнгтæ ма фæлвардзысты æфсинты зонындзинæдтæ ирон къæбицы историйӕ", — дзырдæуы хъусинаджы.
Уымæй дарддæр ма фестивалы фæлгæтты ацæудзысты мастер-класстæ дӕр — фæлтæрд æфсинтæ ӕвзӕнгтӕн амондзысты ирон уæлибыхтæ кæныны сусæгдзинæдтæ.
Мадзал балхынцъ уыдзæн уæрæх концертон программӕ, театралон равдыстытæ æмæ æрмдæсныты армука-равдыстӕй.