ЦХИНВАЛ, 5 окт — Sputnik. Хуссарирыстойнаг делегаци президент Тыбылты Леониды сӕргълӕудӕй ӕртыццӕджы хайад райсдзӕн Цӕцӕны сӕргълӕууӕг Рамзан Кадыровы инаугурацийы церемонийы, загъта президенты пресс-секретарь Гана Яновская.
Хъӕлӕскӕнынады иумӕйаг боны Цӕцӕны 13 азы мидӕг фыццаг хатт уагъд ӕрцыд регионы сӕргълӕууӕджы комкоммӕ ӕвзӕрстытӕ — Рамзан Кадыровы политикон карьерӕйы та фыццаг хатт, кӕцы иуӕндӕс азӕй фылдӕр лӕууы республикӕйы сӕргъ. Ӕвзарӕн къамисы бӕрӕггӕнӕнтӕм гӕсгӕ, Кадыровӕн сӕ хъӕлӕстӕ радтой, ӕвзӕрстыты хайад чи райста, уыдоны 97,94%.
"Тыбылты Леонид абон ацыд Грозныймӕ. Делегацийы сконды ма сты президентон администрацийы къухдариуӕггӕнӕг Джиоты Алан ӕмӕ Ӕдасдзинады советы сӕргълӕууӕг Плиты Анатолий. Уыдон райсдзысты хайад Цӕцӕны сӕргълӕууӕджы инаугурацийы церемонийы", — загъта Яновская.
Инаугурацийы церемони уагъд ӕрцӕудзӕн Шахбулатовы номыл Паддзахадон филармонийы.
Кадыров йӕ бынатмӕ бахиздзӕн йӕ 40 азы юбилейы бон. Уымӕй дарддӕр ма ӕртыццӕджы Грозный 198-ӕм хатт нысан кӕны Горӕты бон ӕмӕ йӕ столицӕйы разамынад баныфс ӕвӕрдтой уый иумӕйаг бӕрӕгбонон фӕзуат фестын кӕнын.
