ЦХИНВАЛ, 24 окт — Sputnik. Хуссар Ирыстоны столицӕйы цӕгаттаг хайы аскъуыд газӕй ифтонгад горӕты магистралон хӕтӕлыл аварийы фӕстиуӕгӕн, фехъусын кодта Sputnik къуырисӕры Паддзахадон унитарон куыстуат "Энергоресурс"-ы сӕргълӕууӕг Гӕбӕраты Алан.
"Дзаттиайы фырты уынгыл, цыран уагъд цыдысты хӕрзарӕзтадон куыстытӕ, хъыгдард ӕрцыд магистралон хӕтӕл. Цӕмӕй авари аиуварс кӕнӕм, уый тыххӕй нӕ бахъуыд Цхинвалы цӕгаттаг хайы — Мӕскуыйы уынгӕй уӕлӕмӕ — ахицӕн кӕнын газ", — радзырдта Гӕбӕраты Алан.
Уый банысан кодта, хӕлд фадыджы цалцӕгмӕ кусджытӕ ныридӕгӕн кӕй ӕрӕвнӕлдтой, цхинвайлӕгты хӕдзӕрттӕм газ фӕхӕццӕ уыдзӕн фӕссихор.
