ЦХИНВАЛ, 24 окт — Sputnik, Козаты Диана. Хуссар Ирыстоны МХМ-ы Криминалон милицийы уголовон агуырды сӕргълӕууӕг Медойты Таймураз ныртӕккӕ Хацырты Таймуразы ныхмӕ ницы хъуыддагыл куыста, загъта Sputnik МХМ сӕргълӕууӕг Лӕууойты Ӕхсар.
Хъахъхъӕнынады министрады ӕфсӕддон службӕгӕнӕг Хацырты Таймураз 22 октябры бафӕлвӕрдта фехсын уголовон агуырды сӕргълӕууӕг Медойты Таймуразы йӕ хӕдзары цур. Марыны фӕлвӕрды рӕстӕджы Медойты Таймуразыл ницы зиан ӕрцыд, Хацыры фырт та оперативон ӕгъдауӕй ӕрцыд ахст. Ацы факты фӕдыл бакондӕуыд уголовон хъуыддаг УФ УК 317 статьямӕ гӕсгӕ.
Генералон прокуратурӕйы хъусинаджы дзырдӕуы, "зӕгъгӕ Хацыры фыртӕн уыд фӕнд Медойты Таймуразы амарын — йӕ куысты архайды фӕдыл йӕ маст райсын.
"Ацы хъуыддаг равзарыныл ныртӕккӕ кусы Генералон прокуратурӕ. Нӕ зонӕнтӕм гӕсгӕ, Медойты Таймураз фыдгӕнӕджы ныхмӕ ницы уголовон хъуыддӕгтыл куыста", — загъта Лӕууойты Ӕхсар.
Министры ныхӕстӕм гӕсгӕ, ӕрцӕугӕ цауы фӕдыл цӕуы алыгъуызон дам-думтӕ мидхъуыддӕгты ӕмӕ хъахъхъӕнынады министрӕдты кусджыты ӕхсӕн ныхмӕлӕуды фӕдыл. Министр банысан кодта, "ацы ныхӕстӕ кӕй сты ӕнӕбындур".
"Иу адӕймаджы тыххӕй мах ӕнӕхъӕн ведомствӕйыл нӕ дзурдзыстӕм. Уый сарӕзта фыдракӕнд ӕмӕ йын ратдзӕн дзуапп", — загъта министр.
Ныртӕккӕ азымгонд Хацырты Таймураз ис Хуссар Ирыстоны МХМ рӕстӕгмӕдарӕн изоляторы.
