ЦХИНВАЛ, 31 окт — Sputnik. Хуссарирыстойнаг футболон командӕ "Спартак-Цхинвал" Абхазы ӕхсӕнадӕмон турнир "Фӕззыгон кубок"-ы фыццаг матчы фӕуӕлахиз сухумаг "Динамо"-йыл 1:0 хыгъдӕй, хъусын кӕны Sputnik Абхазия.
Кубокы хайад исынц 2004 азы гуырд ӕмӕ уыдонӕй хистӕр кары лӕппутӕ. Турниры хайад исынц ӕхсӕз командӕйы: "Динамо", "ДЮСШ", "Нарт" ӕмӕ "Гал" Абхазӕй, "Академия ФК Краснодар" Уӕрӕсейӕ ӕмӕ "Спартак" Хуссар Ирӕй.
"Мах ивӕм нӕ ерысты формат. Кубоктӕ уагъд цӕудзысты аз дыууӕ хатты, уалдзӕг ӕмӕ фӕззӕджы. Уыдон ныридӕгӕн сты ӕхсӕнадӕмон ерыстӕ, абон стадионы сӕрмӕ фӕйлауынц ӕртӕ тырысайы: Абхаз, Уӕрӕсе ӕмӕ Хуссар Иры", — радзырдта футболон клуб "Динамо"-йы президент Астамур Адлейба.
Кубокы хъӕзтытӕ адарддӕр уыдзысты фондз боны, турнир ӕхгӕныны церемони уагъд ӕрцӕудзӕн майрӕмбоны 4 ноябры.
