ЦХИНВАЛ, 3 ноя — Sputnik. Зындгонд циркон артист Олег Поповӕн йӕ зӕрдӕ кусынӕй ӕрлӕууыд ӕртыццӕджы Ростовы — ардӕм уый ӕрцыд гастролты Германийӕ.
Попов райгуырд 1930 азы 31 июлы ӕмӕ уӕрӕх публикӕйӕн ссис зындгонд "хурдзаст клоуны" фӕлгонцы. 1991 азы Попов ацыд цӕрынмӕ Германимӕ, 2015 азы та райдыдта гастролты цӕуын Уӕрӕсемӕ.
"Ростовы амард Олег Попов, уый уым уыд гастролты", — фехъусын кодта РИА Новости Стыр мӕскуыйаг циркы директор Эдгард Запашный.
"Уымӕн ӕрлӕууыд йӕ зӕрдӕ, артист ницӕмӕй хъаст кодта. Фӕдзырдтам тагъд ӕххуысмӕ, уыдон ӕрбацыдысты ӕмӕ банысан кодтой йӕ амӕлӕт", — радзырдта Ростовы циркы директор Дмитрий Резниченко.
Йӕ ныхӕстӕм гӕсгӕ, Поповы хиуӕттӕ хъуамӕ аскъуыддзаг кӕной, кӕдӕм ӕрцӕудзӕн ӕрвыст артисты мӕрдон буар.
Росгосцирк фехъусын кодта, зиан бавӕрыны рӕстӕг ӕмӕ бынаты тыххӕй бадзырдтӕ цӕуынц йӕ чызг Полинӕимӕ Германийы.
Запашный зӕрдыл ӕрлӕууын кодта, Попов кӕй уыд Уӕрӕсейаг ӕмбӕстаг ӕмӕ бахатыд йӕ продюсермӕ, цӕмӕй фӕстаг хӕрзбон зӕгъыны церемони уагъд ӕрцӕуа Стыр мӕскуыйаг циркы. Артисты цардӕмбалӕн йӕ бон нӕ уыд дзурын, банысан кодта циркы директор.
