ЦХИНВАЛ, 3 ноя — Sputnik. Ансамбль "Алания"-йы солисткӕ Бекойты Динӕ, кӕцы сӕххӕст кодта ирон кафт Эльбрусы цъуппыл, ныр та фӕнд кӕны Эверестыл акафын. Уый тыххӕй Sputnik радзырдта артисткӕ йӕхӕдӕг.
Бекъойты Динӕ — Республикӕ Хуссар Ирыстоны сгуыхт артисткӕ йӕ партнер — Цӕгат Ирыстоны зындгонд пластикон хирург Къудзойты Хъазбегимӕ сӕххӕст кодта ирон кафт "Хонгӕ" Европӕйы хӕхтӕй иууыл бӕрзонддӕр, Эльбрусы бӕрзондыл.
Дунейы иууыл бӕрзонддӕр хох Эверестмӕ (8848 метры) сцыд фӕнд кӕнынц сӕххӕст кӕнын 2017 азы июны.
"Хӕрдмӕцыды сӕйраг тренер ӕмӕ къухдариуӕггӕнӕг у РЦИ-Аланийы альпинизмы федерацийы президент Хӕмыцаты Хъазбег, Эверестмӕ иууыл хуыздӕр экспедицитӕй иуы организатор. Мӕ партнер та уыдзӕн Ирыстоны альпинизмы федерацийы вице-президент Гадзайты Альберт", — загъта Бекъойты Динӕ.
Проекты кусӕгон ном у — "Эверест 2017 — Москва на Пике Планеты".
"Проекты номы Мӕскуы ӕнӕхъуаджы нӕй — ӕз райгуырдтӕн Мӕскуыйы, раздӕр та иу мӕскуыйаг ӕмӕ ирон сылгоймаг дӕр никуыма схызтысты "дунейы уӕлхӕдзармӕ", — банысан кодта кафӕг.
Сӕрмагондӕй ацы проектӕн бахуыд ӕрцӕудзӕн уникалон ирон националон дарӕс, наноӕрмӕджытӕй спайдаимӕ. Бахуыйдзӕн ӕй зындгонд дизайнер Годжыцаты Изольдӕ.
Ацы экспедицийы координатор у федералон спортивон уагдон "Юность России"-йы къухдариуӕггӕнӕг, педагогон зонӕдты дохтыр Абайты Алан.
