ЦХИНВАЛ, 7 ноя — Sputnik. Хуссар Ирыстоны дыццӕджы нӕ уыдзӕн рухс. Электрохаххы хызӕджы фадгуытӕй иуыл, кӕцыйыл электроэнерги хӕццӕ кӕны республикӕмӕ Цӕгат Ирыстонӕй, уагъд цӕудзысты нывӕзтгонд цалцӕггӕнӕн куыстытӕ, загъта Sputnik ПУК "Энергоресурс"-ы гендиректор Гӕбӕраты Алан.
Профилактикон куыстытӕ хъуамӕ ацыдаиккой октябры ӕмбисы, фӕлӕ сӕ стӕй ахастой фӕстӕдӕр рӕстӕгмӕ.
"Райсом аст сахатӕй изӕры фондз сахатмӕ нӕ уыдзӕн рухс. Цӕгат Ирыстоны территорийыл уагъд цӕудзысты нывӕзтгонд цалцӕггӕнӕн куыстытӕ", — загъта Гӕбӕраты Алан.
Рухс ахицӕны тыххӕй дыццӕджы республикӕйы нӕ кусдзысты сабидӕттӕ, уымӕн ӕмӕ уагдӕтты фадат нӕй сывӕллӕттӕн хъарм хӕринаг сцӕттӕ кӕнын.
