ЦХИНВАЛ, 7 ноя — Sputnik, Плиты Фатимæ. Цхинвалы фæбæрæг сты Хуссар Ирыстон ӕмӕ Абхазы зынгхуыст хъайтар Хуыбылты Валерийы дыккаг номарæн боксы турниры уæлахиздзаутæ, фехъусын кодта Sputnik турниры сæйраг тæрхонгæнæг, тренер Зæгъойты Игорь.
Турниры архайдтой æртæ республикæйы минæвæрттæ, æдӕппæтæй 107 боксеры. Дыууæ боны ерысты фæстиуæгæн фæбæрæг сты 50-йы онг уæлахиздзауы хицæн уæзы категориты, уыдонæн се ʻмбис сты хуссарирыстойнаг боксертӕ.
"Турниры уæлахиздзауты нымæц бахӕццӕ 50-йы онг, уыдонæн се ʻмбис сты бынæттонтæ. Нæ боксертæй уæлахиздзаутæ чи ссис, уыдонæй иууыл хуыздӕр спортивон цæттæдзинад æмæ уæлахизмæ тырнынад равдыстой Санахъоты Аслан, Тыбылты Алик, Плиты Мурат æмæ Къæбысты Аслан. Ацы лæппутæ сæхи хорз равдисынц куыд бынæттон турнирты, афтæ фæсарæнты дæр. Мæн фидарæй уырны, иу азы фæстæ нæм сæ кады хъуыддæгтæ кæй æрыхъуысдзысты дунейон турниртæй", — радзырдта Зæгъотйы Игорь.
Ерысты Цхинвалы спортивон комплекс "Олимп"-ы сæ тыхтæ фæлвæрдтой 1997-2005 ӕзты гуырд боксертæ Цæгат ӕмӕ Хуссар Ирыстонæй, афтӕ ма Кæсæг-Балхъарæй.
Турнир арæзт цæуы дыккаг хатт президент Тыбылты Леониды инициативæ æмæ йæ финансон æххуысы фæрцы. Ерыстæ соргнизаци кодта фæсивæдон политикæ, спорт æмæ туризмы комитет æмæ Хуссар Ирыстоны Боксы федераци.
